Nunanut allanut unammisartut Paraguay unammileraat: Unammillissaagut, angusaqarusussuseqassaagut qiimassallutalu
![](/sites/default/files/styles/image_934x467/public/2023-12/20231207-211948-L-5307x3538ma.jpg?h=909556d6&itok=y5FEUVG-)
Nunanut allanut unammisartut VM-imi siullermeertumik ajugaasinnaapput, unammisassaalli aamma siullermeertumik ajugaasinnaallutik.
Nunanut allanut unammisartut Paraguayimut nalunaaqutaq 17.30 unammissapput, unamminermilu tassani nunatta VM-imi 29-nngorniunnermut 31-nngorniunnermi unammissanersut aalajangerneqassaaq.
- Unammisartut sukkasoorujussuupput, kisianni tassani unammisartut Islandimit Kinamiillu unammisartut ilaannit anginerunngillat, sungiusaaqataasartoq, Jens Steffensen ullumi unammisassat pillugit oqarpoq.
Taamaammat ajugaanissamut – isertitseriarnissamut tallit nukeqarnissaat ajunnginnissaallu pingaaruteqarpoq:
- Saassussinerannut akiuutissaagut kingullermillu unamminitsitulli isertitaqartigaluta. Taamaaliorutta naligiilluni unamminerusinnaassasoq ilimagaara, Jens Steffensen oqarpoq.
Taakku VM-imi Kinamut arfininngormat unammipput.
Unammineq 32-24-mik ajorsarnermik inerneqarpoq, nunanulli allanut unammisartut immikkoortup aappaani siuariangaatsiartut isertitsinernut allattuiffimmi takuneqarsinnaavoq.
- Unamminermi siullermi periarfissatsinnik atorluaavallaanngilagut, kukkussutitsinnillu isertitseqattaarput. Muminganilli unamminerup aappaani unammilluartorujussuuvugut, isertitsititsinaveersaarnerpullu pitsaanerullunilu uagut isertitsilluaqattaarneruvugut, Jens Steffensen oqarpoq.
Frederikshavnimi tapersersuisoqangaatsiartoq
Saamiatungaani unammisartoq unamminermi pingaarutilimmik inissisimasinnaasut ilagaat.
- Forsvarimi immitsinnut ikioqatigiittariaqarpugut, periartuusaartarnerat sukkasaramik, ilagut qaangertippata ikioqatigiipallalluta taavalu saassussinerni periarfissat takkukkaangata atorluarlugit isertittariaqarpagut, Nivi Petersen oqarpoq.
Stavangerimi illersuisut 100-t sinneqartut erinarsorlutik illersuinerat ajunngilluinnarpoq, Frederikshavnimili illersuisut suli amerlanerupput.
![](/sites/default/files/styles/image_934x467/public/2023-12/20231207-211952-L-4079x2719ma.jpg?itok=9ydzSfA-)
Nunanut allanut unammisartunut illersuisut unnummut unamminermi 400-t 500-llu akornanniissapput.
- Nuannertorujussuuvoq, unammilerluni kajumissaarneqarluni, eqqaasittaramitigut suna pillugu unamminersugut nunarput pillugu unammigatta. Nivi Petersen oqarpoq.
Nunanullu allanut unammisartut unnugu ajugaallutik illersuisunut utertitsilaarunik tamanna isumaqangaatsiassasoq taanna oqarpoq.
- Naak unamminerpassuarni ajorsaraluarluta tunniutiinnanngilagut. Tamanna illersuisunit tapersersuinermillu qularnanngitsumik pissuteqarpoq. Unnugu ajugaasinnaagutta isumaqartorujussuussaaq, Nivi Petersen oqarpoq.
Paraguayimut unammineq KNR1-ikkut toqqaannartumik 16:30-mit aallakaatinneqalissaaq, unamminerlu 17.30 aallartissalluni.
Kasakhstan Iranimut ullumi siusinnerusukkut ajugavoq. Taamaammat nunatsinneersut ullumi ajugaassagunik Kasakhstanimeersut 29-nngorniuunnermi unammissavaat, ajorsassagunillu 31-nngorniuunnermi Iran unammissallugu.