Timersorneq

U-18 aamma sapinngillat: Kina-mut VM-riassapput

Kalaallit arnat inuusuttut assammik arsarlutik nunanut allanut unammisartut U-18-it Puerto Ricomut unamminermi kingullermi ajungaangamik Kinamut aappaagu juulimi nunarsuarmi pissartanngorniuteqataasussanngorput.

Allattoq Gaaba Olsen, Mikkel G. Rasmussen

decembarip 08-at 2023 07:46

- Takorloortuaannarsimavara, ingasassuaarpoq. Tukummeq Berthelsen unammisartut aqutsisuat oqarpoq.

Taanna unammiaqatinilu aappaagu Kinami nunarsuarmi pissartanngorniuttoqarnissaannut anngupput.

Puerto Ricomi anngunniupput, aallartinnerlioraluarlutilli ingerlarsorput.

- Unamminerit siulliit ajornakusoortitsipput, neriuutaarukkaluarpugummi, pisinnaasarput tamaat sukataarpugut, unammisartut aqutsisuat oqarpoq.

Mexico Martiniquemut ajorsamat kalaallit arnartaat VM-mut anngunnissaminnut periarfissaqalerput. Anngutissagunillu nunaminni unammisut Puerto Rico ajugaaffigisariaqassavaat.

- Unamminerput ukkatariniaannaavipparput pissanganaveersaarluta, unamminitsinniinniarsaraluta.

Puerto Ricormiut nunaminni unammigamik illersuisuilu najuuttorpassuullutik, taakkua illersuilluaaqaat, taamaaanneralu unammiartutsinnut sunniuteqarput. Sungiusaasuat Victoria Svendsen taama oqarpoq.

Aamma atuaruk Presidents Cup: Assammik arsartartut nuannaartut VM-imi siullermeertumik ajugaanissartik neriuutigigaat

Taamaakkaluartoq nuanut allanut unammisartut Puerto Ricomut 38-36-mik ajugaapput.

- Tupinnaqaaq, angeqaaq, annguppugut, pissartanngorniunnerit sioqqullugit neriuuteqarpallaarnaveersaarpugut. Unammisartuutigut tulluusimaarutigeqaakka, sungiusaasuat Victoria Svendsen oqarpoq.

Unamminerat VM-imut anngunnerinnaanngilaq, agguaasummi isorlerisartagaat Hannah Petersen pissartanngorniunnerni arsallaqqinnerpaatut toqqagaavoq.

- Nuanneqaaq, tupaallannarpoq. Hannah Petersen tulluusimaarluni oqarpoq.

Pissartanngorniunneq

U-18 unammisartut unammisaqattaarnertik ulapputigigaluarlugu nuannaartorisamik, arnat inersimasut, Norgemi unamminerat aamma malunnaaffigaat.

- Unammineri tamaasa isiginnaarpagut. Maligassiusuuppummi. Uangullu aamma taakkunatut suleqatigiittut anersaalisimaarnissarput sulissutigissavarput. Victoria Svendsen oqarpoq, malitsigitiinnarlugu Tukummeq Berthelsen ilaliivoq:

- Arnat taakku nuannaartoraagut, unamminerat siulleq isiginaaratsigu killitsisimaarnaqaaq. Tamatta nikuippugut erinarsoqataallutalu. Soorlumi aamma ilatsinni qiasoqalaarunartoq.

Arnat nunanut allanut unammisartut Norgemiillutik nunarsuarmi pissartanngorniuteqataanerat U-18-inut kajumilersitsivoq.

- Taakkutuulli pikkoritsigilerusuppugut, pitsaanerulluta. Uagullu aamma Kalaallit Nunaat VM-ersinnaasoq takutikkusupparput. Tukummeq Berthelsen oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.