Umimmaat qimaannakkat: Toqoraaneq piniarnermut allagartamik naleqarsinnaavoq
Kalaallit Nunaanni Politiit Siggummi, Upernaviup aamma Uummannap akornanni inissisimasumi, umimmaat 30-t aallaaneqarsimallutik qimaannarneqarsimanerminni asiusut pillugit takunnissimasinnaasunik piffissami matumani ujaasileruttorput.
Umimmaat 30-t siumorneqarsimasut pillugit Upernavimmi Politiinut sapaatip akunnera kingullermi pingasunngornermi nalunaaruteqartoqarpoq.
Umimmaat 30-t sumiiffinni pingasuni, Arfertuarsummi, Uummannap tungaaniit tikinneqartartumi aamma Millorfimmi Amitsumilu, Upernaviup tungaaniit tikinneqartartuni, toqorarneqarsimasut siumorneqarsimapput.
- Siggummi umimmannik toqoraaneq unioqqutitsineruvoq ilungersunartoq akiliisitsinermik, arsaarinninnermik allaat piniarnermut allagartamik arsaarinninnermik kinguneqarsinnaasoq, Aalisarnermut Piniarnermullu Naalakkersuisoqarfimmi immikkoortortami pisortaq, Amalie Jessen, tusagassiuutinut nalunaaruteqarluni taama oqarpoq.
AAMMA ATUARUK Ilisimannittussarsiortut: Umimmaat 30-t aallaaneqarlutillu qimaannarneqartut
Amalie Jessenip oqarnera naapertorlugu nakkutilliisut suliaqapallanneratigut paasissutissanik katersisoqareersimavoq, maannakkullu Kalaallit Nunaanni politiit umimmaat toqorarneqarnerannut tunngasumik takunnissimasinnaasunik ujaasipput.
Politiilli suliaq ataasinngornermi oqaaseqarfigerusunngilaat.
- Killiffik tassaavoq Upernavimmi politiit arlalinnit saaffigineqarsimanerat, taakkualu maanna misissuiffigileruttorpaat. Taamaattumik maanna annertunerusumik oqaaseqarsinnaanngilagut, Kalaallit Nunaanni Politiit KNR-imut mailerlutik taama ilisimatitsipput.
Aalisarnermut Piniarnermullu Naalakkersuisoqarfimmit inuit umimmannik 30-nik toqoraasoqarsimaneranut takusaqarsimasimasinnaasut imaluunniit tusagaqarsimasinnaasut politiinut saaffiginninnissaannut kaammattuuteqarput:
- Umimmannik toqoraanermut atatillugu takunnissimasinnaasut allatigulluunniit ilisimasaqarsinnaasut Naalakkersuisoqarfimmiit kaammattorusuppagut politiinut imaluunniit nakkutilliisunut saaffiginneqqullugit., Amalie Jessen oqarpoq.
Aalisarnermut Piniarnermullu Naalakkersuisoqarfimmit aamma ilisimatitsissutiginearpoq Siggummi amerlasoorsuunngitsunik. Taamaattumik ukiumut piaqqiarineqartartut aamma killeqarput:
- Taamaammat killilimmik umimmattassiisoqartarpoq, umimmanniarnissamullu akuersissutit qinnuteqartitsinikkut makitsisoqarnikkullu agguaanneqartarlutik. Umimmanniarnissamut akuersissutinik qinnuteqareernerup kingorna makitaasut kisimik umimmanniaqqusaapput, taamaallaallu umimmammik ataatsimik pisaqaqqusaasarlutik, Amalie Jessen taama nassuiaavoq.