Umiartortut 50-t suliffissaaruteriaannaapput
Pilersuisup nunaqarfinnut ilaasunik nioqqutissanillu assartuinermut ukiortaaq aallarnerfigalugu isumaginnittuulernissaanut nalunaarusiaq, sulisitsisutut akuerisinnaanagu, Royal arcic Line-ip nunaqarfinnut sullissinerani pisortaq Niels Clemmensen oqarpoq.
Nalunaarusiaq piviusunngussappat nunaqarfinnut pajuttaatini sulisut 50-it missaaniitut suliffissaarutissapput.
Nalunaarusiaq piviusunngussappat Aqqaluk ittukkut allallu atorunnaarsinneqarnissaat pilersaarutigineqarpoq, taakkununnga taarsiullugu nunat allamiut angallataat attartukkat isumaginnilernissaat pilersaarutaalluni. Tamanna akuerineqarsinnaangilaq, royal arctic line-ip nunaqarfinnut sullissinerani pisortaq Niels Clemmensen oqarpoq.
Nunaqarfinnut usinik assartuinermi angallatit atorneqartut atorunnaarsinneqarnissaat nalunaarusiami siunnersuutigineqarpoq, taamaasappallu sulisut massakkut sulisorineqartut 50-it missaaniitut soraarsinneqartariaqassapput, Niels Clemmensen oqarpoq.
Angallatit Ittummik naggatillit sineriammi atorneqartut sisamat tassani pineqarput, inuttallu tamarmik atorfissaarunneqassapput, nunat allamiut angallataanik attartornissaq nalunaarusiami siunnersuutigineqarmat.
Tamanna akueriuminaapoq, ingammik inuttat ilaat ukiuni 25-iniit 30-inut aalajaallutik sulisimatillugit, Niels Clemmensen oqarpoq.
Ilanngullugu oqaatigaa politikerit aaliangiinissaat tullinnguutoq, taakua isummerfigisariaqassammassuk taamatut periuseqartoqalissanersoq
Royal arctic line-ip siulersuisuini siulittaasoq Jørgen Høy aamma isumakuluppoq.
Naalakkersuisut pisariillisaaniarnerat akikinnersiuillutillu aaqqissuusiniarnerat pissusissamisoorpoq, sukkavallaamillu pilersaarutit piviusunngortinniarneqarput, Jørgen Høy oqarpoq.
Ilanngullugu oqaatigaa ataatsimiitarnerni peqataasarsimallutik, allanngortitsinissarlu ukiortaaq aallarnerfigalugu ingerlanniarneqarmat sulisut sinnerlugit qisuariaateqarluni, ukiortaarnissaanut qaammatit pingasuinnanngulermata.
-Politikerit inatsisartuni ilaasortat aaliangiisussat eqqarsarluartariaqassapput, royal arctic line-ip siulersuisuini siulittaasoq Jørgen Høy oqarpoq.
Nunaqarfinnut ilaasunik usinillu angallassisalernissaq pillugu nalunaarusiaq oktoberip naalernerani inatsisartuni aaliangiiffigiiffigineqartussaavoq.
