Umiarsuit nutaat umiarsuarnik takornariartitsilluni nunatsinnukartarneq sivitsussavaat
Kalaallit Nunaata sineriaani peqqarniissinnaasumi angallataasinnaasunik umiarsuarnik takornariartaatinik immikkut sanaartortoqarpoq.
Miamimi umiarsuarnik takornariartaatinik saqqummersitsinermi peqataareerluni Anders La Cour Vahl Visit Greenlandimeersoq angerlarami taama nalunaaruteqarpoq.
Tamakku assigiinngitsunit soqutigineqaqaat. Assersuutigalugu Celebrity Cruises aamma Ponant nalunaarput ukiuni tulliuttuni pingasuni sikumut akiuussinnaasunik ilaasartaatinik nutaanik ikinnerpaamik sisamanik sanaartussamaarlutik, La Cour Vahl oqaluttuarpoq.
Takornariartaatinik angalarusuttoqartoq upperaat
Royal Arctic Linemi aamma Blue Water Greenlandimi takornariartaatinut attuumassuteqartuni sanaartugassat isumalluarfigineqarput.
- Umiarsuaatileqatigiit ukioq kaajallallugu issittut imartaanni angalasalerniartut paasinarpoq. Aasaanerani avannaani ukiuuneranilu kujataani. Maani umiarsuarnik takornariartaatinik angalarusuttoqarnera upperaat, Gorm Diernisse RAL-imeersoq oqarpoq.
Aamma atuaruk Umiarsuit takornariartaatit aatsaat taama amerlatigisut
Blue Water Greenlandimeersoq Kriatian Buus Hald oqaluttuarpoq Miamimi Kalaallit Nunaannut takornariarusunneq soqutigineqarsimaqisoq, umiarsuarnillu sikulimmi angalasinnaasunik immikkut sanaartortoqarnerata ersersikkaa, takornarianit umiarsuaatilinnillu issittup imartaani angalanissaq soqutigineqartoq.
Piffissap takornariat takkussortartiat sivitsorneqassaaq
Umiarsuarnut isumannaannerusunut aningaasaliinerup maanga takornariartoqarnerunissaanut periarfissanik ammaassisoq, Diernisse oqarpoq.
- Uatsinnut assut nuannerpoq, ullutsinnummi naleqqiullugu piffissap takornariat takkussortarfiata sivitsorneqarneranik tamanna kinguneqarsinnaammat. Umiarsuimmi sanaartorneqartussat silarluttumiluunniit angalasinnaassapput, aasaaneranilu sivikitsuinnarmik maaniittarnertik sivitsorsinnaalissagaat, Royal Arctic Linemeersoq Gorm Diernisse oqarpoq.