Umiarsuit takornariartaatit aatsaat taama amerlatigisut
![OBS billedet må kun bruges til ’oplevelsesøkonomisk indhold’ – det vil sige historier, der handler om turisme](/sites/default/files/styles/image_934x467/public/article_images/kayakers_in_front_of_ms_fram_in_north_greenland_near_illorsuit.jpg?itok=iA-jcXGy)
- 2015-imi angusaqarluarpugut aamma 2017-imi aatsaat taama amerlatigisut aqqusaassamaarpasipput, Gorm Diernisse Royal Artctic Linemeersoq oqarpoq.
Nassuiaavorlu umiarsuit ataatsikkuullattaasartut. Ima paasillugu ukiut ilaanni amerleriarlutik, aappaaguani umiarsuit takornariartaatit akuttoqqittartut.
Maannakkorpiaq ataatsimut isigalugu amerliartorput, naallu 2016-imi tikittoqarpianianngikkaluartoq aappaagu amerlasuut takkunnissaat naatsorsuutigisinnaavarput.
Aamma atuaruk Takornarialerisuunikoq: Naalakkersuisut imminnut aaginnarput
Maannakkutut isikkoqartillugu 2015-imut naleqqiullugu 2017-imi 20 aamma 25 procentit missaanni amerleriassasut, Gorm Diernisse Royal Arctic Linemeersoq oqarpoq.
Tamatumunnga pissutaavoq ukiut aningaasarliorfiusut qaangileratsigit.
- Nunarsuarmioqativut aningaasaateqarnerulersimapput, taamaattumillu umiarsuarnik takornariartaatinik pissanganartumik angalarusuttarlutik.
Diernissep tamatuma saniatigut aamma tikkuarpaa, Imaq Akullersuarmut Carribiamullu takornariarpassuaqartartoq.
- Taamaattumik umiarsuaatileqatigiit amerlasuut ornitassanik nutaanik nassaarsiortarput, Atlantikullu avannaa amerlasuunit assut pilerigineqartarpoq.
Maanngaanniit isigalugu aamma pingaaruteqarpoq Kalaallit Nunaata takornariartaassuit akuleraarutaat appartissimammagu.
- Umiarsuaatileqatigiinnit tamanna assut tusarluarneqarsimavoq.
Aamma atuaruk Umiarsuit takornariartaatit aatsaat taama ikitsigisut
Kinguneraa maanga umiarsuarnissaq suliffeqarfinnit assut pilerigineqalersimammat.
- Umiarsuit takornariartaatit atorlugit Kalaallit Nunaanni iluanaarniarnissaq ajornakusuulersimagaluarpoq, maannali taamaakkunnaarpoq.
Sunali tamarmi ajunngittuinnaanngilaq. Imaani angallannermi inatsisit nutaat atuutilerput, juulillu aallaqqaataaniit ilisimasortaqartalersussaapput. Tamakkulerisut akornanni toqqissisimanngillat malittarisassat qanorpiaq atuutsinneqassanersut nalornissutaammata.
Tamakkulerisut malittarisassat akuerisimagaat Gorm Diernisse oqarpoq, saaffigineqaraangamilu akissutissaqartuaannanngilaq.
- Ilisimasortassarsinngitsoornerup kinguneranik aallanngittooriataarsinnaanitik annilaangatigaat, imaluunniit ilisimasortat qanoq akeqassanersut ilisimannginnamikkit. Tamakku allallu aaqqinneqartuuppata iluaqutaassagaluartoq Diernisse oqarpoq.