Takornarialerisuunikoq: Naalakkersuisut imminnut aaginnarput

Takornarianut unmiarsuarnut ilaasunut akitsuusersuineq atorunnaarlu umiarsuit angissusaat aallaavigalugu akitsuusersuisoqartalissappat isumatusaarnerunnngilaq.
Allattoq Mads Pedersen
septembarip 27-at 2014 12:00

Nunatsinni takornarioaqarneq pillugu siunnersuisoqatigiit qanga pisortaanerisimasaa Stig Rømer Winther taama isumaqarpoq. Taanna aamma isumaqarpoq, Naalakkersuisut Visit Greenlandi sipaarfiginiarunikku imminnut aaginnassasut.

 

- Imminut pisarineruvoq, Stig Rømer Winther Naalakkersuisut pilersaarutaannut taama isummerpoq.

 

Taanna Nunatsinni takornarioaqarneq pillugu siunnersuisoqatigiit pisortaanerugallurami takornariat umiarsuarmik tikittartut akiitsuutinik akiliisalernisssaanik isumassarsisut ilagaat. Taamani akitsuusiinikkut umiarsuarnut takornariartaatinut aammalu takornarianut atugassarititaasut pitsanngorsaanissaq siunertaaavoq. 

 

- Taamani umiarsuit tikittartut tulakkusunneq ajorput, umiarsualivinni atugassarititaasut pissutaallutik utoqqaat nunamukaannisaat ajornakusoortarmat. Taamaammat Naalakkersuisut oqarfigaagut, umiarsuarnut takornariartaassuarnut ilaanermut akitsuusiigaanni, umiarsuaateqarfiillu oqarfigalugit, talittarfinni atugassarititaasut pitsanngorsarnissaannut atorneqassasut, taavalu niunissaq ajornannginneruilissasoq. Taava Nunarput aningaasanik isaatitsinerulissaaq, tamannalumi iluatsippoq, Stig Rømer Winther oqaluttuarpoq.


Talittarfinnili atugassarititaasut suli pitsanngunngillat.

 

- Naalakkersuisut aningaasat isertut talittarfinnik pitsanngorsaanermut atornisaat puiorpaat.

 

Tassalu takornariat atugaat pitsanngoratik, akit qaffaannartut, Stig Rømer Winther nassuiaavoq.

 

Aamma Nunatta takornariat amerlanerusut tikittalernissaat siunertarippagu, umiarsuit angissusaat aallaavigalugit akitsuusersuisaleqqinnissaq aqqutissaasorinngilaa, akitsuusersueriaaseq taanna siornatigut ajoqutaaginnarsimammat.

 

- Umiarsuit ilaasoqassusaat aallaavigalugit akitsuusersuisaleqqinnissamut siunnersuut qularnarteqaara, taannarpiarmi atorunnaarsinnikuuarput. Taannalu atorunnaarmat takornariat umiarsuarnik Nunatsinnut tikittartut amerleriarnikuupput, Stig Rømer Winther oqarpoq.

 

Tassuma aamma Visit Greenlandimut aningaasaliissutit 13,9 millioniusut Nunatta avammut tuniniarnissaanut naammannginnerarpai. 

  

- Takornariat Kalaallit Nunaannut tikittartut amerliartussappata nunap avammut nittarsaalluarnnissaa pingaarnerpaavoq. Naalakkersuisut siulittaasuat eqqaasikkusuppara, uanga Greenland Turismemi pisortaaninni ukiumut 20 millionit sinnerlugit aningaasalerneqartatugut, aningaasallu amerlanerpaartaat Kalaallit Nunaat nittarsaannissaanut atortarivut, Stig Rømer Winther oqarpoq.