Umiarsuit takornariartaatit aatsaat taama ikitsigisut

Aasaq manna timmisartumik angalasut imaaginnavissimapput angalaffissallu ilaanni bilitsit tamakkerlutik nunguttarlutik, imaatigulli angallanneq qiviaraanni allatorluinnaq isikkoqarpoq. Naalakkersuisulli siuariartortoqarnissaa ilimagaat.
septembarip 22-at 2015 05:38
Nutserisoq Simon Uldum -

Umiarsuarnik takornariartitsinermi 2015 annikinnerpaaffiugallarpoq. Umiarsuarnummi takornariartaatinut ilaasut ukiormanna aamma ikileriaqqipput.   

Taamatullu annikillisoqarsimaneranut inuussutissarsiornermut naalakkersuisup Vittus Qujaukitsup politikerit pisooqataanerarpai, akitsuutilli apparnerisigut ilorraap tungaanut ingerlasoqalissasoq neriuutiginerarpaa.

- Umiarsuarnut takornariartaatinut ilaasut aatsaat taama ikitsiginerat pissuteqarpoq. Tassalu akitsuutit qaffasissut ukiuni kingullerni arfineq-marlunni atuussinerat, Vittus Qujaukitsoq oqarpoq, taassuma naatsorsuutigaa akitsuutit aappaagumit appasinnerulerpata tamanna takornariartaatinut ilaasut amerleriarnerannik kinguneqarsinnaassasoq.