Politiit ullormut nalunaarutaat: Angallat Nanortallip eqqaani kivivoq

Allaatigisaq una Kalaallit Nunaanni Politiit paasissutisseeqqereerneranni ullaaq manna aqqanermut qiteqqutilertoq nutarterpoq. 

Angallammik ikkarlittoqartoq politiinut sisamanngornermut unnuaani pingasut missaanni nalunaarutigineqartoq, Kalaallit Nunaanni Politiit pigaartuisa pisortaat Bent Johnsen oqarpoq.

- Angallammi issimasut tamarmik annaanneqarput, tassa ajunaartoqarnanilu ajoqusertoqanngilaq. Angallatip ikkarlittup angissusaa pissutigalugu kaanngartinneqarsinnaasimanngimmat kivivoq, Bent Johnsen oqarpoq.

Taamaammat annanniutit Nanortallip eqqaani immami puttasut angallammik umiiartoqareernerani takussaasut navianartorsiortoqanngimmalli Nanortalimmiut ernumasariaqanngitsut, Kalaallit Nunaanni Politiit pigaartuisa pisortaata erseqqissaatigaa.

- Ernumasoqartariaqanngilaq. Politiimmi qatserisartullu ikkarliffiup nalaaniipput, Bent Johnsen oqarpoq.

Angallat umiiartoq ullaaq manna arfineq-marluk qaangilaaraa kivisimasoq angallammilu orserfiit solaarimik 15.000-20.000 literit missaannik uuliamillu 100 literit missaannik suli imaqassangatinneqartut, politiit sisamanngornermi ullaap tungaani ilisimatitsipput.

Taamaammat angallat kivisoq mingutsitsineranik kinguneqartumik uuliakooratarsinnaammat politiit qatserisartullu suleqatigiillutik kiviffiata nalaani puttaqusiipput, Kalaallit Nunaanni Politiit tusagassiorfinnut nalunaarumminni allapput.

Aasianni ikuallattoqartoq

Aasianni nukissiorfimmi ikuallattoqartoq angallammik umiiartoqarneranik nalunaartoqarnerata nalaani aamma politiinut aamma nalunaarutigineqarpoq.

Politiit facebookimi sisamanngornermi ullaakkut taama allapput.

- Sarfaliuut ikuallaleraluarsimasoq paasinarsivoq, politiit pigaartuisa pisortaat oqarpoq.

Aasianni nukissiorfimmi sarfaliuutit ikuallannerata kingunerisaanik illoqarfik akunnerup ataatsip missaani sarfaqanngereerluni unnuaq sisamat qaangeraat sarfaneqqittoq, politiit facebookimi allapput.