Nuummi inuusuttuuneq pillugu atuakkiortoq Debora H. Kleist atuakkamik saqqummersitsivoq.
Nuummi inuusuttuuneq qanoq ippa?
Debora H. Kleistip oqaluttualiamini Sarsuatitani” tamanna akissuteqarfiginiarsaraa. Atuakkiap danskisuua ”Livets Strøm” aamma saqqummerpoq. Debora Qaqortumi 1985-imi inunngorpoq, ujarassiuutullu ilinniagaqarluni – Nuummili inuusuttuunermut festernerminillu nuannarisaqarnissamut qanoq ilisimasaqarpa?
Debora H. Kleist oqaluttualiami sapinngisamik imminut ilanngunniarsarivoq. Illoqarfiillu pingaarnersaanni inuusuttuunermi sapinngisaminik iliuuseqarluni.
Oqaluttualiaq inuusuttumut Nuummeersumut Idamut, ilinniarnertuunngorniareerlunilu ukiumik isummersorfeqartumut inuunerminilu suniarnerminik aalajangiisussamut tunngassuteqarpoq. Piffissami sunngiffeqareernerup, festertaareernerup, aalakoornermillu inuunerlunnerup, asasamillu aliasuuteqarnerit kingorna avataarsuanik ilisimatusarnermi suliffeqarusunnermik takorluukkani anguniarniarlugu aalajangerpoq.
Piumasaqaatit qaffasissut isummallu pigiliutiinnakkat
Københavns Universitetimi fysikkimik ilinniarneq siulliuvoq. Tamanna naatsorsuutigisaatut inngilaq, tassani piumasaqaatit qaffasingaatsiartut isummallu pigiliutiinnakkat nalaappai – angulli nuannerluinnartoq aamma naapillugu.
Ida piffissap ilaani Nuummut ataataminut qanimut attaveqarfiginngisaannarsimasaminut najugaqarallariartorpoq. Uanilu inuunerup isumaa apeqqusertalerpaa, aammalu naaggaarsinnaasoq unneqqarinnerlu – aamma nammineq pilluni ilinnialerpai.
Debora H. Kleistip oqaluttualiiani siulliuvoq, taannali allanngisaannarsimanngilaq. 2015-imimi unammisitsinermi Allatta! 2040-mi ajugaasut ilagaat. Unamminermi tassani ajugaasut allat tassaapput Niviaq Korneliussen, Sørine Steenholdt, Pivinnguaq Mørch aamma Paninnguaq Møller.
- Reykjavikkimi Allatta! 2040 pillugu workshoppertitsioqarmat Nuummi inuusuttuuneq Danmarkimullu avalalluni ilinniariartornermi misigisassat pillugit takisuuliamik atuakkiussallunga isumassarsivunga, taanna tusagassiuutinut nalunaarummi oqarpoq.
- Suut pissanganarsinnaasut tamaasa aammali eqqartussallugit oqimaassinnaasut atuakkiassannut ilanngutissallugit isumaliutigaakka, ilaatigut ilinniakkamik toqqaanermi peqqissimineq naatsorsuutigisimasaraluamillu allaalluinnartumik toraagaqarnerliorneq eqqartorusullugit. Tassa taama oqaluttualissara isumassarsiareqqaarpara tassannga ineriartortileriarakku pilersaarutigisimasannit allamut angutillugu naammassillugu.
- 2015-ip kingornagut inuuninni pisorpassuupput. Kandidatitut ilinniagaqalerpunga, katissimasunngorlunga marlunnillu qitornaqalerlunga. Maanna fiisterajuttuujunnaarpunga. Neriuutigali tassa nalitsinni inuusuttuusut oqaluttualiakkut imminnut ilisariffeqarsinnaassasut, taanna oqarpoq.
Oqaluttualiaq sisamanngornermi septembarip 26-ani saqqummissaaq. Saqqummersitsineq Nuummi Inuk Hostelsimi nalunaaqutaq 16-imiit malunnartinneqassaaq.