Royal Greenland: Ulapaarfimmi suliartortitat maanaannaq angerlakaasut
Royal Greenlandip ilisimatitsissutigaa tamatuma kingunerisaanik Royal Greenlandip tunisassiorfiutaani arlalinni ingerlatsinerup tungaatigut ajalusoorujussuartoqartoq, ulapaarfimmilu suliartortitat angerlarlutik aallartut ataatsimut isigalugit nunatsinni sumiiffinnit assigiinngitsuninngaanneersuusut.
Ulapaarfimmi suliartortitat amerlasuut sulinermik sungiussisimanngitsuusut erserpoq. Arlallit sivisuumik suliffeqanngitsuusimakkajuttuupput. Ilaat angerlarsertarput allallu imigassamik assigisaannilluunniit atornerluinermik ajornartorsiuteqarput, sulisoqarnermi siunnersortaaneq Søren Olsen Damgaard Royal Greenlandip nittartagaanut oqarpoq.
AAMMA ATUARUK Royal Greenland Tunumeersunik sulisussarsisoq
Ulapaarfimmi sulisussanik ukioq manna suliartortitseqqinnianngitsoq
2018-imi ulapaarfimmi sulisut nunatsinneersut katillugit 100-ngajaapput, Kinameersut 18-iupput, Filippinerineersut qulingiluaapput Nordjobbimeersullu 24-iullutik.
- Suliartortitat affaasa missaat naak angerlarlutik aallaraluartut suliartortitat nunanit kangilliineersut sulisullu aalajangersimasut aalajaatsut nunatsinneersullu aalisartut aalisagartaminnik qalerualittaminnillu ataavartumik tunisisarnerminnik attassiinnarsinnaasimanerannut qularnanngitsumik iluaqutaapput. Søren Olsen Damgaard oqarpoq.
Taassuma ilanngullugu oqaatigaa ulapaarfimmi sulisussanik aalajaatsunik sulisussarsiorneq pisariusorujussuusarmat Royal Greenland ulapaarfimmi sulisussanik ukioq manna suliartortitsinavianngitsoq.
AAMMA ATUARUK Royal Greenland nunatsinneersunik sulilersitsisariaqarpoq