Qimmit akusat pillugit suliaqa ingerlaqqippoq. Qimmit assimiittut allanit akusaanngillatAssi: Carl Skou

Ukiuni tallimani sukkaniuteqataasinnaajunnaarsitaasoq

Kalaallit Nunaanni qimussertartut kattuffianni KNQK-mi ileqqorissaarnissamut ataatsimiititaliap aasaanerani qimmit akusat pillugit suliaq oqallisaaqisoq suliaraa

Qimussertartoq Qeqertarsuarmeersoq ukiuni tallimani KNQK-p aaqqissuussaani peqataasinnaajunnaarsitaagallarpoq.

KNQK-ni ileqqorissaarnissamut ataatsimiititaliaq qanittumi taama aalajangerpoq.

AAMMA ATUARUK KNQK: Qeqertarsuarmi qimmit qimuttut marluk allanertanik akusaasimapput

Qimmit akusat pillugit suliaq 2018-mi aallartippoq. Taamani qimmiutilik pasillerneqarpoq qimminik allanik akusanik eqqussisimasutut. Taamatullu pisoqarsimanera naqissuserneqarpoq 2019 naalersoq DNA atorlugu misissuinikkut paasineqarmat qimmit pineqartut allamiut qimmiinik akusaasut.

SULIAP INGERLANIKUUNERA:

Januar 2018:

  • Kalaallit Nunaanni Qimussertartut Kattuffiat, KNQK, pasilliutinik anngussivigineqarpoq.

Oktober 2018:

  • KNQK-p Qeqertarsuarmiut Kangerlummiullu pasilliuteqartoqarnera pissutigalugu oktobarip 17-ani 2018-mi Avannaata Qimussersuanut mattummagit suliaq avammut saqqummiunneqarpoq.

November 2018:

  • Inatsisartut aalisarnermut piniarnermullu ataatsimiititaliaata taamani aalisarnermut piniarnermullu naalakkersuisuusoq qimmit pasilliutigineqartut DNA-vi misissorneqassasut piumasaraat. Misissuiffigineqalereerpulli.

Marts 2019:

  • Kukkuluttuttoqarneratigut DNA-mik misissuineq januarimili piareersimasussaangaluaq kinguarpoq.

Maj 2019:

  • DNA-mik misissuineq piareerpoq - inernerali isertuunneqarpoq.

Juni 2019:

  • Kommune Qeqertalimmit uppernarsarneqarpoq qimmillip kissaateqarneratigut qimmit pasilliutigineqartut oktobarip 25-ani 2018-imi toqunneqarsimasut.

Juli 2019:

  • Aalisanermut piniarnermullu naalakkersuisup uppernarsarpaa innuttaasup suliamut akuusup inatsisitigut innarlitsaaliugaanerata qulakkeerneqarnissaa kiisalu sulianik suliarinnittarnermi pisortat sulianik pineqaatissiissutaasinnaasunik suliaqarneranni tunngaviinut malittarisassat eqqortinneqartussaaneri.

Oktober 2019

  • Suliaq eqqartuussivimmut anngunneqassangaluaruni pisoqalereersimassammat politiit suliamik misissuinerminnik unitsitsipput

Decembar 2019:

  • Qimmit qimuttut marluk DNA-visa misissorneqarnerisa allanertanik akusaasut takutippaat.

 

Aasaq 2020:

  • KNQK-p qimussersat ukiuni tallimani mattunneqarnissaat aalajangerpaa.

- DNA atorlugu misissueqqissaarnermi qimmit allamiut qimmiinik akusaanerannik paasisat aalajangerniarnitsinni atorpavut. Uppernarsaatit pigisavut tunngavigalugit qimussertartoq Qeqertarsuarmeersoq ukiuni tallimani KNQKp aaqqissuussaani peqataasinnaatitaassanngitsoq aalajangiupparput, KNQKmi siulittaasoq Naja Siegstad KNR-ut oqarpoq.

Suliaq politiit unitsippaat

Kalaallit qimmiat inatsisitigut illersugaavoq, tassanilu allassimavoq kalaallit qimmiat allamiut qimmiinik akuneqassanngitsoq.

Suliami pineqartumi politiit akuliutsinneqarput. Politiilli paasiniaanertik unitsippaat suliaq eqqartuussivimmut anngunneqassagaluarpat suliaq pisoqalisooreersimassammat. Qimminik pineqartunik piginnittup nammineerluni qimmit oqallisaaqisut toqutsippai.

AAMMA ATUARUK Slædehundesag: Politiet dropper efterforskning

Taamaakkaluartoq tassa KNQKmi ileqqorissaarnissamut ataatsimiititaliap suliaq ingerlateqqippaa.

- Peqatigiiffitsinni siunertat pingaarnerit ilagaat kalaallit qimmiata illersorneqarnissaa. Eqqaaneqareersutut ukiuni tallimani peqataasinnaajunnaarsitsivugut. Qimminik piginnittoq aamma piumaffigineqarpoq qimmii qimminut allanut minnerpaamik 100 meterinik ungasissuseqartinneqassasut, Naja Siegstad oqarpoq.

- Taamaasilluta anguniarparput qimmit allat taassuma qimmiinut nuliunnginnissaat. Tassami pasitsaassimaneqarpoq qimmit pineqartut piginnittup qimmiinut allanut nuliusimasut. 100 meterimik ungasissusiliinikkut kalaallit qimmii illersorniarpagut, Naja Siegstad oqarpoq.

Tamarmik peqataaqqussaanngitsut

Qimmit akusat taakku pissutigalugit ukiormanna Avannaata Qimussersuaqarnissaraluani Qeqertarsuarmiut peqataasinnaatitaanngillat.

- Qeqertarsuarmeersut tamarmik peqataasinnaajunnaarsitaanerat ileqqorissaarnissamut ataatsimiititaliami oqaluuserinngilarput. Ataatsimiititaliap inunnut ataasiakkaanut tunngasut suliassarai. Qeqertarsuarmiut tamarmik peqataasinnaatitaannginnerannut tunngasoq KNQKmi siulersuisut aalajangigassaraat, Naja Siegstad naggasiivoq.

Aappaagu Avannaata Qimussersui Ilulissani martsimi pissaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat