Politiit ullormut nalunaarusiaat: Ukiukitsunik inuusuttunillu tillinniarnerit aserorterinerillu arlallit
Poltiiit aserorterineq tillinniarnerlu pillugit tallimanngornerup unnuaani marloriarlutik unnerluuteqarfigineqartut, pigaartut pisortaata, Malik Olesenip paasissutissiissutigaa.
Unnerluutigininneq siulleq nalunaaqutaq 01:50-ip missaani pivoq, tassa Sisimiuni ukiukitsut politiit biiliinut Brugseneeqqamullu aserorterileruttortut unnerluutigineqarput.
- Ukiukitsut sisamat politiit biiliinut milloorlutik igalaavinik aserorsillutillu Brugseneeqqap matua igalaajusoq aserorsimagaat pineqarpoq, Malik Olesen oqarpoq.
Ukiukitsut sisamat politiinit iluatsittumik tiguneqarlutillu apersorneqarput. Suliamilu ukiukitsut pineqarmata isumaginninnermik oqartussaasut meeqqanullu oqartussaasuusut suliamut ilanngutitinneqarput, politiillu suliamik misissuineq nangeqqillugu.
- Ukiukitsut sisamat politiinit ilisimaneqartuupput. Assingusumik pisoqarneranut atatilluguunersoq takusinnaanngilara, kisianni taakku pillugit suliaqareernikuuvugut, pigaartut pisortaat oqarpoq.
Nuummi ajornartorsiutit
Aamma Nuummi ukiukitsoq inuusuttorlu pillugit unnerluutiginnittoqarpoq. Ullaaq tallimat qaangilaaraa illoqarfiup qeqqani grillbarimut tillinniartoqarnera unnerluutigineqarpoq.
- Tillinniarneq grillbarimut Centrumgrillimut tillinniarneruvoq, tassani ukiukitsoq 18-illu ataallugit ukioqartut pineqarput, suliami tassani isumaginninnermi oqartussat aamma ilanngutitippagut, Malik Olesen oqarpoq.
Pinerluuteqartut marluk politiinit aamma ilisimaneqartooreerput.
Politiinit takuneqartut
Ukiukitsup inuusuttullu saniatigut 18-inik ukiullit marluk Nuummi neriniartarfinnut marlunnut aamma tillinniarsimapput. Taakku politiinit paasineqartut, pigaartut pisortaat oqarpoq.
- Politiit nakkutilliisut neriniartarfiit ilaanni tillinniartut tillitaminnik tigummiaqartut tigusaraat. Taamammat inuit taakku marluk tigusaaqqapput maannalu killisiorneqassallutik, pigaartut pisortaat oqarpoq.
Inuit marluk politiinit aamma ilisimaneqareersuusut, pigaartut pisortaat paasissutissiivoq. 18-inik ukiullit marluk tigummigallarneqassanersut politiit suli ilisimanngilaat.
Tillinneq, tillinniarnerit aserorterinerillu politiit piffissami matumani nakkutigingaatsiaraat, pigaartut pisortaat oqarpoq.
Taamaammat innuttaasut maluginiaalluarnissaannik pasinartumillu takunnikkunik politiinut sianernissaannik aamma kaammattuteqarfigai. Politiit oqarasuaammut 70 14 48-mut attavigineqarsinnaajuaannarput.
