Politiit ullormut nalunaarusiaat: Nuummi sumiiffinni assigiinngitsuni serlersaarisoqarlunilu tillinniariaraluartoqarpoq

Serlersaarisimasut, tillinniarsimasut tillinniariaraluarsimasullu politiit marlunngornermut unnuaani ulapputigaat, politiillu tamatumani suliami misissuinerminni ikioqqupput.

Allattoq Nicole Sander Bertelsen

novembarip 07-at 2023 10:28

Nutserisoq Hanne Petersen

Inuusuttut Nuummi Nuussuarmi marlunngornermut unnuaani serlersaarisimasut, tilliniarsimasut tillinniaraluarsimasullu, Kalaallit Nunaanni Politiit pigaartuisa ittuat Bjørn Bjerregaard marlunngornermi ullaakkut ilisimatitsivoq.

Politiinut marlunngornermut unnuaani nalunaarutiginninnerit arlaliupput. Siullermik neriniartarfimmi Isikkivimmi tillinniartoqartoq, ataatsimut qiteqqunnerata missaani aanmma sanaartugassiissutinik suliaqartartut maskiinarsuaasa ilaannut biilinullu inissitanut serlersaartoqarsimasoq, pingasut missaanni nalunaarfigineqarlutik, politiit pigaartuisa ittuat ilisimatitsivoq.

Aamma atuaruk Ujaasineq: Angutit pingasut maqaasineqartut ujaarineqarnerat nanginneqartoq

- Inuusuttut Nuummi Nuussuarmi serlersaaginnarnatik Nuuk Internationale Friskolemi sisamanut qiteqqunnerata missaani aamma tillinniariaraluarsimasut taavalu allaffeqarfiit ilaannut serlersaarsimagunarput.

- Suliatta ilaani nalornisaqarpugut, sulilu misissuileruttorluta. Inuusuttunilli Nuussuarmi serlarsaarisoqarsimasoq, tillinniartoqarsimasoq tillinniariaraluartoqarsimasorlu eqqumaffigeqquarput, politiit pigaartuisa ittuat ilisimatitsivoq.

Politiit aallartiffissaqanngitsut

Politiit inuusuttunik taamaaliorsimasorisaminnik suli tigusarinninngimmata aallartiffissaqarpiaavinngillat, ataatsimilli pasisaqarlutik. Sulili misissuileruttoramik qanorpiaq pisoqarsimanersoq oqaatigisinnaanagu, Bjørn Bjerregaard oqarpoq.

- Pasisavut inuusuttut pingasuusut oqaatigiinnarsinnaavara, taanna oqarpoq.

Politiit misissuineranni iluaqutaasinnaasunik takunnissimasutut ilisimannittutulluunniit paasissutissaateqaruit 701448-mut sianerfigalugit attavigisinnaavatit.