Arsaanneq: Ukiorpassuanngortuni arnat silami nunanut allanut unammisartui septemberimi katersuuterngaalerput

Silami arsaannermi arnat nuna tamakkerlugu sungiusaasortaavata Danny Jungip Nunatsinni pissartanngorniunnermi najuuterngaarnermini takusani isumaliutersorfigileruttorpai.

Taanna siornatigut akissarsiutigalugu arsaattartuuvoq akissarsiutigalugulu sungiusaasutut Europami arsaattartut kattuffissuata UEFAp ataani ilinniarsimasuulluni. Aamma qallunaat inuusuttuni inersimasunilu arnani nunanut allanut unammisartuini sungiusaasuusareerpoq.

- Assorujussuaq isumaliutigivara niviarsissat arnallu arsaannermi avatangiiserissaartinnissaasa qulakkeerniarnissaa, Danny Jung KNR-mut oqarpoq, peqatigiiffiillu peqataasut tunngavigalugit nangilluni:

- Arsaannerup pitsaassusaanut sunniuteqataasorujussuaq tassaavoq peqatigiiffiit pingasut Nuummeersuummata iligiillu ataatsit kujataaneersuullutik. Taamaattumik iligiinnik toqqaaniarnissamut tunulequtaasut Kalaallit Nunaat tamaat isigissagaanni amigarput, Danny Jung oqarpoq.

Taamaattumik sineriammi sungiusaasut attavigineqassapput nunanut allanut unammisartunut piukkunnartunik allanik nassaarnissaq eqqarsaatigalugu.

Inissisimaffissat suli agguataanngillat

Iligiit sisamat pissartanngorniuteqataasut takutitaat nikerartoq Danny Jung naliliivoq.

- Pitsaassuseq ajunngilaq. Kisianni aamma eqqarsaatigisariaqarpoq arsartut GM sioqqullugu qaammatini arlalinni sungiusarsinnaasimannginnerat. Ilaammi tallimariaannarlutik sungiusaarsimapput, Danny Jung oqarpoq.

- Taavalu ullut tallimat ingerlaneranni sisamariarlutik unammillutik. Akissarsiutigalugu arsaattartut kakkannerpaat taamatut piumaffigineqarnavianngillat. Ulluni tallimani sisamariarlutik unammeqquneqarnavianngillat, Danny Jung naliliiniarnissamut tunngavini pillugit oqarpoq.

Toqqarallakkat septemberimi sungiusaqatigiinnissannut qaaqqusissutinik nassiussisoqarumaarpoq.

Kalaallit unammisartuisa arsariaasissaat nassuiaassutigineqassaaq aammalu arsaattartut qanoq sungiusarluarsinnaanerat qaqilerneqassalluni.

Ukiorpaalunngortuni siullerpaamik silami unammisartut arnat katersuuttussanngorput.

Tulliullugu tikinneqassaaq arsartunut ataasiakkaanut arsaaffimmi suliassat sorliit tulluarnerunersut.

- Ukioq manna tamanna itisilernavianngilarput. Aappaagu ukiullu tulliuttut tikikkumaarparput arsartunut sumiiinnissaq tulluarnerunersoq, nukittuffiit qanoq atorluarneqarsinnaanersut, Danny Jung oqarpoq.

Nuummi sungiusaqatigiinnissamut suli ulluliisoqanngilaq.