Arsaanneq: NÛKp arnartai silami arsaannermi pissartanngorput

NÛKp Nuummeersup arsaattui nuannateqaat peqatigiiffiup arnartai silami arsaannermi arfininngormat Nuup arsaaffiani pissartanngormata. GSS finalemi ajugaaffigaat marloraarlutik taakku susaartut.

Finalemi unammissavaat nunaqqatitik GSS-meersut taakkulu kingullermi silami pissartanngorniuttoqarnerani 2019-mi pissartanngortuupput. Tamatuma kingorna arnat silami pissartanngorniutinngillat corona aamma nalunaartut ikippallaartarneri pissutaallutik.

- Silami pissartanngorniuttoqaqqinnera assorujussuaq nuannaarutigaarput aammalu qujamasuttorujuulluta K-33 peqataammat, NÛKmi anføriusoq Karo Dahl KNR-mut oqarpoq.

Unammersuarneq pisortatigoortuussappat pinngitsoorani iligiit ikinnerpaamik sisamaasussaapput. NÛK, B-67 aamma GSS Nuummiit peqataapput kiisalu K-33 Qaqortumiit tikeraartortatuaallutik.

Unamminerni aallarniutaasuni NÛK GSS-mut ataatsimik isertitsinerulluni ajugaaqqareerluni finalemi unammilernermi unammisatik mersernartutut isigivaat.

Aallartinnermi tupatsitsineq

- Isumaqatigiissutigereerparput pikkorissortaat oqilasoortaallu paareqqissaarniarlugit, Karo Dahl oqaluttuarpoq.

- Aamma isumaqatigiippugut aallartiinnavilluta tupatsitseriassalluta. Tamanna iluatsippoq sekundit siulliit aqqaneq marluk iluanni isertitsigatta

GSS-mi arsartut amerlanerit assammik arsarnermi ilisimaneqareerput qasujaatsuullutik ukiorlu kaajallapajaarlugu sungiusartuartuullutik.

- Qujanartumik aamma uagut arsartoqarpugut ukioq kaajallallugu illup iluani silamilu arsaattartunik. Silamik sungiusarnissamut piffissaqarpallaarsimanngilagut. Illulli iluani sungiusarluarsimaneq iluaqutaaqaaq, Karo Dahl oqarpoq.

Unammineq naammassisoq nalunaarlugu dommeri inaarutaasumik siggarmat oqiliallattoqarpoq.

- Tulluusimaqaagut, nuannaaarluta oqiliallallutalu. Silami arsaannermi 2017-mili pissartaanikuunngilagut. Taamaattumik iluatsikkatsigu assorujuk nuannaarpugut.

B-67 Nuummeersoq bronzennappoq K-33 Qaqortumeersoq sisamaattut inissittoq.