Nunatta nakorsaanera: Ukioqqortunerit akiuussusertissimasut ikippallaarput – taamaammat juullikkunni nappaalasoqassagunavippoq
Coronamik nualluummilluunniit influenzamik tunillanneqarsimasut amerlanerpaartaat kissarneqarlutik, quersorlutik saannerillutillu siniffimmi ullualunni nalasariaqartarput.
Ukioqqortunerilli anigorsinnaanngisamilluunniit nappaatillit coronamik nualluummilluunniit influenzamik tunillanneqarsimasut sakkortunerungaatsiartumik atortarpaat peruluutigisarluguluunniit.
Taamaammat 65-ileereersimasut coronamut nualluummulluunniit influenzamut ukiortinnagu akiuussusertissassut, nunatta nakorsaanerata Henrik L. Hansenip qaammatialuit matuma siorna kajumissaarutigaa.
Akiuussusertissimasulli suli ikippallaarput.
65-ileereersimasut 44,4 procentii taamaallaat coronamut ukiap ingerlanerani akiuussusertissimapput. Taakkualu ikipallaartut, Henrik L. Hansen isumaqarpoq.
- Akiuussusertissimasut amerlagisassaanngillat. Siorna akiuussusertittut amerlanerungaatsiarput, taakkualu nunanut allanut naleqqiulluta ikipallaartut paasillugu nuannerpallaanngilaq, taanna oqarpoq.
Assersuutigalugumi Danmarkimi 65-ileereersimasut anigorsinnaanngisamilluunniit nappaatillit 73 procentii akiuussusertissimapput. Nunatsinnilu akiuussusertissimasut tamatuma missaanik aamma amerlatigisariaqaraluartut, nunatta nakorsaanera isumaqarpoq.
- Coronamik tunillanneqarneq peruluutaalersinnaasoq eqqaamasariaqarpoq, taanna oqarpoq.
Nunatsinni sumiiffinni assigiinngitsuni 65-ileereersimasuni anigorsinnaanngisamilluunniit nappaatilinni akiuussusertissimasut amerlassusaat nikingangaatsiarput. Assersuutigalugu Paamiuni 36,5 procentii Maniitsumilu 73 procentii akiuussusertissimapput.
Ingammik juullikkunni nappaalasoqassagunavittoq
Peqqinnissaqarfik coronavirusimik tunillanneqarsimasunik novembarip ingerlanerani nalunaarsugarpaaloqalereersimasoq, nunatta nakorsaanera oqarpoq. Coronavirusili nunatsinnut juullisioriat tikerarneranni tuniluutilertoqqeriaannaasoq, Henrik L. Hansen naliliivoq.
- Nunani allani, aamma Danmarkimi, tuniluutingaatsialereersimasoq nalunngilarput. Danmarkimiit juullisiorianik sapaatit akunnerini aggersuni tikerartoqangaatsiartussaassaq, taakkulu coronavirusimik nappaatinilluunniit allanik aamma tunillannartunik siornatulli qularnanngitsumik tunillanneqarsimasortaqassapput.
Taamaammat ukioqqortunerit tunillanneqarnissamik juullikkunni aarlerinaateqarneruleriaannaassagunavittut, taanna oqarpoq.
- Coronavirusi juullisioriat tikerarneranni qularnanngitsumik tunillaassornerulissaaq. Tassa ukioqqortunerit ilarpassui coronavirusimik tunillanneqarsimanermik peruluuteqarnissamik qaammatini aggersuni aarlerinaateqarneruleriaannaasussaassapput.
