Nunatta nakorsaanera corona pillugu: 65-inik ukioqalereersut tamarmik akiuussummik kapitittariaqarput
Ukioq sinnerlugu covid-19—imut atatillugu killilersuisoqanngereersoq inuit 65-iliisimasut utoqqaanerusullu aamma inuit perulunnissamut aarlerinaatillit covid-19-imut nualluummullu akiuussuserneqarnissaat Nunatsinni Nakorsaaneqarfiup innersuussutigaa.
Peqqissutsimut Naalakkersuisoqarfik taama tusagassiorfinnut nalunaarput.
Covid-19 aamma nualluutit ukiaq manna ukiorulu amerlasuunut siaruaallutik tunillaassuutilernissaat ilimanarmat taama kaammattuipput.
- Covid-19 aamma nualluut inuit amerlanerit sakkukitsumik atussavaat, taamaattorli ilaannut perulunnarsinnaavoq aamma unitsinneqartariaqalernermik kinguneqarsinnaavoq, ajornerpaamillu pisoqassappat inuunermik navianartorsiortitsisinnaalluni, nalunaarummi oqarput.
Kikkut akiuussusertissappat?
Inuit 65-inik ukiullit tamarmik utoqqaanerusullu.
Inuit 65-it inorlugit ukiullit napparsimallutik perululersinnaanerusut aamma perulunnartunik nappaatillit, nuallunnermik imaluunniit covid-19-imik napparsimanerup kingunerisaanik peqqissutsiminnik ulorianartorsiulersinnaasut, inuit pualavallaartut aamma inuit inoorlaamik najugaqateqartut imaluunniit timimi akiuussutissakitsunngorsimasut.
Naartunerup immikkoortuata aappaani aamma pingajuanni naartusut.
Immikkut aarlerinartorsiortut akiuussuserneqarnissaannut peqqinnissaqarfimmiit aggersaasoqarnavianngilaq. Innuttaasut ataasiakkaat neqeroorummi pineqartut namminneerlutik najukkami piffissami akiuussusersuisoqarnissaanik neqeroorfiusumut saaffiginnissapput.
Sapinngisamik piaarnerpaamik 1. oktobari 2023-p kingorna akiuussusersuisoqarumaarpoq. Sumiiffiit ilaanni atuarfinni katersortarfinnilu annertunerusumik akiuussusersuinissamut neqerooruteqartoqarumaarpoq.
Sumiiffinni allani napparsimavinni aamma peqqissaavinni kiisalu nunaqarfimmut tikeraarnermi akiuussusersuisoqarumaarpoq.
Illoqarfinni nunaqarfinnilu ataasiakkaani pilersaaruteqalerniariartoq najukkami allagarsiisoqarumaarpoq allatigullu attaveqaqateqartoqarumaarluni.
