Ukaleq Slettemark TV2-mi piviusorsiortulersaarummi peqataavoq

Ukaleq Slettemarkip sisorarluni atisai inuit kakiornerinik allalersukkat taarserlugit sakkutuutut atisat atineqarput.

Tamanna pivoq TV2p pivisiorpalaartumik aallakaatitassiaani Korpsetimi, tassanilu tusaamasat 14-it namminneq timimikkut misigivaat sakkortuut frømandskorpsit aamma jægerkorps ilannguffiginiarlugit misilitsinnermi suut aqqusaarneqartarnersut.

Immiussinissamut piareersarnerit siorna isertorluinnarluni aallartisarneqarput.

- Ukioq unammiffiusoq siorna aallartinngilaartoq aallakaatitamut peqataasussarsiortartumit attavigineqarpunga. Aamma eqqarsarfissalerneqarpunga. Uannulli ajunngivippoq. Taamaattumik peqataarusoqaanga, Ukaleq Slettemark KNR-mut oqarpoq.

Arlaleriarlunilu Danmarkiliartarnermut tamanna aallarniutaaginnarpoq tamatigulli ikinngutini oqaluttuussinnaaneq ajorpai angalanerup siunertaa pillugu, immiussinerillu apriilimi upernaaq pipput.

Sakkutuut immikkut sungiusakkat tatitussusaat

- Apriimili tamanna isertuuppara. Aamma isertuussiniarneq ajornakusoorsimavoq, Ukaleq Slettemark oqaluttuarpoq.

- Aamma mobiilinik nassataqanngivikkatta silarsuaq avatitsinniittoq attavigisinnaanngivissortarparput, oqarpoq.

Timersuutigisaa sisoraaserluni ooqattaasartarneq eqqarsaqqissaarnissamik pisariaqartitsiffiusarpoq eqqorniagaq tennisip arsaaraatut angitigisoq meterinik 50-nik ungasitsigalugu eqqorneqartussaasarmat. Tamannalu ilungersunarseriaannartarpoq sekundinik pingaaruteqaqisunik annaasaqarnaversaarluni uniornaversaarnissaq pisariaqarluinnaleraangat.

- Peqataanissamut akuersininnut pissutaavoq nalunnginnakku sakkutuut immikkut sungiusakkat tatitussutsikkut nukittoorujussuusut aammalu tatitussuseqarnissamut sakkussalersorneqarluartartut, Ukaleq Slettemark oqarpoq.

- Sakkutuut immmikkut sungiusartagaat ilimanarpoq nammineq anguniagaqarninni iluaqutigisinnaallugit. Ilimanarpoq misigisaq una inuuninni allannguinerpaajusoq. Pikkunarsimaqaaq assullu ilikkagaqarnarluni, Ukaleq Slettemark oqarpoq.

Aallakaatitassiat imarisai pillugit peqataasut maannakkut oqaluttuarsinnaatitaanngikkallarput.

Korpset TV2 Playimi septemberip arfernat isiginnaarneqarsinnaalissaaq TV2 Echomilu septemberip 13-at aallakaatinneqassalluni.