Sisoraaserluni ooqattaasarneq: Ukaleq Slettemark inersimasuni VM-mi malersuunnermut annguppoq
Sisoraaserluni ooqattaasarnermi nunarsuarmi kakkannerpaat ulluni makkunani Tysklandimi Oberhofimi katersuuteqqapput. Tassani nunarsuarmi pissartanngorniunnermi arnat unammissutaat siulleq tassaavoq 7,5 kilometerimut naatsumut unammineq.
Apuuttunit 95-nit Ukaleq Slettemark 56-tut inissippoq. Taamatut inissinnermigut siullerpaamik inersimasut nunarsuarmi pissartanngorniunneranni malersuunnermut annguppoq.
Sapaat 12. februar nal. 09.25: 10 kilometer malersuunneq
Pingasunngorneq 15. februar nal. 10.30: 15 kilometer ataasiakkaarneq
Ataasiarluni uniorpoq sinnerili qulingiluat tamaasa eqqorlugit eqqoriagaq tennisip arsaaraatut angitigisoq meterinik 50-nik ungasitsigalugu ooqattaasarfigineqarmat.
- Ilimaginikuuara qulit tamaasa eqqorukkit malersuunnermut anngussinnaallunga. Qulingilualli eqqorlugit tamanna iluatsippoq, tamannalu nuannerluinnarpoq, Ukaleq Slettemark aappassaa inersimasuni nunarsuarmi pissartanngorniuteqataasoq oqarpoq.
Anoreqarnissaa neriuutigaa
Sapaatiuppat 10 kilometerimut malersuunnermi peqataasut 7,5 kilometerimut unamminermi tulleriinnertik malillugu aallartinneqartassapput. Peqataasut arlallit sekundinik arlaqanngitsunik akunneqarlutik aallartartussaapput taamaattumillu ooqattaasarnerit puullaaqinartoqarsinnaapput.
- Ooqattaasarluaraanni siuariartoqarsinnaavoq tamannalu uanga tassa iluatsinniagassarivara, Ukaleq Slettemark oqarpoq.
TV2-mi sisoraaserluni ooqattaasarnermi oqaluttuusartup Christian Wolfip arlaleriarluni Ukaleq Slettemark nersualaartarpaa seqqornermini anorimik naatsorsuillaqqinnerarlugu.
- Anoreqassappat neriuutigisinnaavara allat uniussasut. Taamaasissappat uanga periarfissagissaarnerulissaanga, Ukaleq Slettemark oqarpoq.
Sapaatiuppat malersuuttoqareerpat pingasunngorpat ataasiakkaarluni 15 kilometerimut unammisoqassaaq.
