Uffe Ellemann-Jensenip »H.C. Hansenip allagaqarsimanera« illersoraa

Danskit ministeriunerusimasaata H. C. Hansenip USA-p atomimik sakkussianik Kalaallit Nunaanniititsisinnaaneranik akuersisimanera illersorlugu danskit nunanut allanut tunngasunut ministererisimasaat Venstremeersoq Uffe Ellemann-Jensen maanna nalunaaruteqarpoq.

Aviisimi Berlingskemi ullumi saqqummersumi taama allaaserisaqarpoq.

“Amerikamiut kissaataannik itigartitsisoqarsimasuuppat tamanna Danmarkip sillimaniarnikkut politikkimi inissisimaneranik annertuupilussuarmik sunniuteqarsimassagaluarpoq.”

Uffe Ellemann-Jensen Berlingskemi ullumi saqqummersumi taama allaaserisaqarpoq.

Filmip "Idealistenip" sammineqarnerani suliaq qaqeqqinneqarpoq. Amerikamiut sakkutuuisa timmisartuat brintimik qaartartulianik useqarluni Pituffiup eqqannguani 1968-imi nakkarnera, ajutoornerullu kingorna inuit saleeqataasimasut peqqissutsimikkut annertuumik ajoqusersimasut filmimi oqaluttuarineqarput. 

AAMMA ATUARUK Lars-Emil aamma Vittus: Pituffik pillugu suliaq Nunatta Danmarkillu akornanni pissutsinik ajornerulersitsiinnarpoq

Danmarkip Radioani tusagassiortup suliaq 1995-imi misissuiffigilermagu ministeriunerup H. C. Hansenip USA-p USA-p atomimik sakkussianik Pituffimmiititsisinnaaneranik akuersisimanera paasinarsivoq. Tamannalu Folketingi Kalaallit Nunaallu ilisimateqqaarnagit pisimavoq, aammalu piffissami sorsuffiunngitsumi Danmarkip pigisaani atomimik sakkussiaqannginnissaanik danskit politikkeqaraluartut taamatut pisoqarluni.

 

Nunap sillimaniarnissaanut pisariaqartumik iliorpoq

Uffe Ellemann-Jensenili naapertorlugu H. C. Hansen piffissami tassani allatut ilioriarsinnaasimanngilaq.

Danmark Sovjetunionimit tatineqarsimavoq illuatungaanilu USA NATO-mi iligalugu. Taamaammat Danmarkip USA itigartissinnaasimanngilaa, Ellemann-Jensen taama isumaqarpoq:

“Kingumut qiviarlunga H. C. Hansenip iliuuserisimasaa ataqqivara, akisussaaffik annertooq tigummillugu taamatut allagaqarluni amerikamiut Pituffimmi sakkutooqarfimmi atomimik sakkussianik inissiisinnaaneranik nipaarsaarussilluni akuersisimammat. Ataatsimut isigalugu - allatut iliuuseqarsimasinnaanera takujuminaatsippara.

Nunap sillimaniarnissaanut pisariaqartumik H. C Hansen iliorpoq. Tamannalu tamanut ammasumik pisinnaasimanngilaq”, Uffe Ellemann-Jensen ullumi taama allaaserisaqarpoq.

Filmi "Idealisten" Ilulissani, Sisimiuni Nuummilu filmertarfinni ulluni makkunani takutinneqarpoq.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl