Ataatsimiititaliap akuutinneqarnissaq amigaatigaa Pele Brobergilu siunersiuinissamut aggersarlugu
Naalakkersuisut oqaaseqartarnerat pissutigalugu nunanut allanut tunngasunut, sillimaniarnermut illersornissamullu politikki nutaarsiassaqarfinnit sammineqangaatsiarput.
USA-mit nunanut allanut tunngasunut ministerip tikeraarnera nunatta Issittumi Siunnersoqatigiinni qaffasinnerusumi inissisimalernera.
Tamatuma saniatigut nunanut allanut tunngasunut naalakkersuisup, Pele Broberip Issittoq pillugu periusissiaq nutaaq kiisalu isumaqatigiissutit 1,5 milliardit koruunit pillugit isornartorsiuinera.
Inatsisartut nunanut allanut sillimaniarnermullu ataatsimiititaliaata tamakku nutaarsiassatigut paasissutissarsiffigisarpai.
AAMMA ATUARUK Mette Frederiksen: Isumatigiissutit oqallisigeqqinnissaat nalinginnaalluinnarpoq
Ataatsimiititaliamimi ilaasortat naammattumik ilisimatinneqarneq ajorlutik isumaqarput, taamaammat Pele Broberg matoqqasumik siunersiorneqarnissaanut aggersarneqarpoq.
- Illersornissamut tunngatillugu iliuuseriniarneqartut assigiinngitsut pillugit nunanut allanut tunngasunut naalakkersuisup ilaatigut oqaatigisimasai pillugit itisiliinissaq uani siunertarineqarpoq.
- Annertunerusumik iliuuseqarnissamut qallunaat nunaanninngaanniit aningaasaliiffigineqartussat taakkua pillugit oqaatigineqartut piffissami kingullermiit itisilerneqarnissaat siunertaralugu
Inatsisartunut nunanut allanut sillimaniarnermullu ataatsimiititaliaani siulittaasoq, Sofia Geisler (IA) oqarpoq.
Sofia Geislerip oqarnera naapertorlugu siunersiuineq tamat malinnaaffiginnissinnaanagu matoqqasuussaaq.
Isumaqatigiissutit aamma Pele Broberg
Sofia Geislerip ataatsimiititaliamilu ilaasortat sinnerisa itisilertinniagaat isumaqatigiissutinut tunngavoq.
Februarimi naalakkersuisuusimasut isumaqatigiissutigisimagaluarpaat, issittumi suliaqarnerunissamut isumaqatigiissummi, Danmarkip issittumi Atlantikullu avannaani najuunnera annertunerulissasoq.
Danskit illersornissamut ministeriata, isumaqatigiissut saqqummiunneqarmat oqaatigaa, isumaqatigiissut Kalaallit Nunaat peqatigalugu suliarineqarsimasoq. Taannami ima oqarmat:
- Savalimmiormiunik kalaallinnillu qanimut suleqarsimaneq, danskit naalakkersuisuinut pingaaruteqarsimavoq, taama Trine Bramsen oqarpoq.
Pele Brobergili ataasinngormat KNRimit oqaloqateqarnermini allatut misigisimavoq. Taassuma ilaatigut eqqaavaa, Naalakkersuisut nutaat nunarput sakkulersorfiunnginnissaa kissaatigaat.
- Danskit politikeriisa isumaqatigiissut akornaminni namminneq isumaqatigiissusiaraat. Tunngaviatigut maanngaanniit ilassuteqarfigineqarnikuunngilaq. Kalaallit Nunaanniit peqataanani isumaqatigiissusiaq suliaavoq, taamaallaanuna isumaqatigiissut Kalaallit Nunaanut tunngaannartoq, Pele Broberg KNRimut taama oqarpoq.
