TV-aviisip sangutitsinera naalakkersuisup iliuuseqarfigisariaqarpaa

Allattoq Jaaku Lyberth
apriilip 24-at 2007 13:30

Great Greenland-ip umiarsuarmik puisinniarsinnaanermik, piniarnermut pisortaqarfimmut qinnuteqarsimanera,oqaluuserissallugu massakkut tulluanngilaq, nunanullu allanut naalakkersuisoq Josef Motzfeldt piaartumik iliuuseqartariaqarpoq, Danmarks Radio-milu nutaarsiassaqartitsiviup TV-avis-ip nunatsinni puisinniartarneq sangutillugu oqaluttuarineqarnera naalakkersuinikkut qutsinerpaat tikillugit suliarineqartariaqartoq, Nunatsinni Inuit Issittormiut Siunnersuioqatigiit siulitaasuata Aqqaluk Lynge-p piumasaraa.

Aqqaluk Lynge ullup qeqqanut radioavise-qarnermi ima oqarpoq:

”Isumaqarpunga periuseq taamaattoq, ullumikkut oqaluuserineqarnera taamaatsillugu piffissaangitsoq taamaattoq oqaluuserissallugu naalakkersuisutigoortumik uloriarnartorujussuuvoq.

Una periuseq, TV-Aviisip Danmark-imi atugaa, suli avaanngunarnerooq, tassalu oqalutitsinera sangutitsinera equtitsineralu, erniinnaartumik naalakkersuisut qanoq iliuuseqarfigisariaqaraat sakkkortunerpaamik qutsinnerpaamullu anngullugu,” Aqqaluk Lynge oqarpoq.

” Aamma isumaqarpunga ullumikkut naalakkersuinikkut akisussaassuseqartumik qanoq iliuuseqartoqassappat, Nunanut Allanut Naalakkersuisutta Josef Motzfeldt-ip una suliassaq tigusariaqaraa, taassuma qangali nalunngilaa, attuumassuteqarfigigamigit, qanoq suliarineqartartut sualummillu EU-mut attaveqaatigut Bruxelle-miittut atorlugit tuaviortumik qanoq iliuuseqarnikkut suliarisariaqartoq, kiisalu nunatsinni aamma taakkuninnga suliaqartut ataatsimut ataatsimiillutik tassalu Naalakkersuisut, KNAPK, ICC , taakkuulluta ilisimasagut aammalu attaveqaatigut atorlugit pissutsit ajortivinnginerani aaqqinniapallattariaqartoq aningaasarsiornitsinni annertuunerujussuarmik sunniuteqarnerlussinnaammat, Nunatsinni Inuit Issittormiut Siunnersuisoqatigiivisa siulittaasuat Aqqaluk Lynge oqarpoq.

Nunatsinni Inuit Issittormiut Siunnersuisoqatigiit ICC-p siulitaasua Aqqaluk Lynge ilanngullugu oqarpoq, ilaqutariit puisinniarnermik inuunniuteqartut tusagassiuutitigut sangutillugit oqaluttuarineqarneratigut eqqugaasinnaasut.