Tuukkaq Teatret saaguvoq: “Oqaluttuarisaanera naggaserpoq”

Erninguaq Poulsen, isiginnaartitsisartoq Benedikte Bendo Schmidt aamma erinarsortartoq isiginnaartitsisartorlu Rasmus Lyberth Tuukkaq Teaterip silataani oqaloqatigigatsinni killitsisimaarput.

Taakkua ataasinngornermat Jyllandimi illoqarfiit ilaannut Fjaltringimukarput, tamaaniipporlu illorujussuaq aappaluttoq qarmagaq tassaasoq kalaallit Danmarkimi ukiuni kingullerni 48-ni isiginnaartitsisarfiat Tuukkaq Teatret nunatsinni ullutsinni isiginnaartitsisarfeqarneranut tunngaviliisuusoq.

- Isiginnaartitsisarfik qaammatit kingullit tallimat ingerlaneranni imaarparput, suliarlu imaannaanngilaq. Tassa Fjaltringimi ukiuni 40-ni isiginnaartitsisarfipput oqaluttuaannanngorpoq. Assigiinngitsorpassuartigut killisimaarnarpoq. Kulturittami oqaluttuassartaanut ilaalluinnartoq peertussanngorpoq, Tuukkaq Teaterimik pilersitsinikup Reidar Nilssonip uillarnera Erninguaq Poulsen oqarpoq.

Tassa norgemiup Reidar Nilssonip kalaaleqatittalu Benedikte Bendo Schmidtip Tuukkaq Teatret Danmarkimi 1975-imi pilersippaat. Isiginnaartitsisarfik taanna kalaallit isiginnaartitsisarfiisa isiginnaartitsisartunngorniarfiisalu siullersaraat.

Isiginnaartitsisartoq Teater Katumilu isiginnaartitsissusiortartuusoq Benedikte Bendo Schmidt aamma Rasmus Lyberth Tuukkaq Teaterimi isiginnaartitsisartunngorniatut ilinniakkamik 1979-imi naammassinnittunut ilaapput.

- Tuukkaq misigisarpassuaqarfiginikuugatsigu uagutsinnut tunissuterujussuuvoq, isiginnaartitsisarfimmik taassuminnga pilersitseqataasuusoq Benedikte Bendo Schmidt oqarpoq.

Misigisarpassuaqarfiusoq

Naggueqatigiit inuit kulturiat Tuukkaq Teaterimi isiginnaartitsinermi tunngaviusarpoq. Qilaatersorneq uaajeernerlu isiginnaartitsinerni qitiusartunut aamma ilaapput.

Ileqqutoqqavut taakkua nunasiaanitsinni inerteqqutigineqarnerisa kingunerisaanik aarlerinartorsiortinneqaleraluarput.

Tamanna nuannarineqaqisumik “Inuit”-mik taallugu isiginnaartitsissusiornermik nuilaatigut kinguneqarpoq. Taassuminnga isiginnaartitsisartoqatigiit nunatsinnut, Danmarkimut nunanullu allanut isiginnaartitsiartortarlutik angalapput.

- Danmarkimi isiginnaartitsinerup silarsuaata iluani suliaqaqataanikooqaagut. Tassanilu taamanikkut isiginnaartitsisartoqatigiiulluta New Yorkimut, Manilamut, Costa Ricamut, Europamut, Canadamut, Alaskamut isiginnaartitsiartorluta angalanikuuvugut. Nuannisartaqaagut. Tassa Tuukkaq qujassutissaqarfigeqaarput, Benedikte Bendo Schmidt oqarpoq.

Aammali imaannaanngitsukasiusimasoq, taanna aamma oqarpoq.

- Oqaluttuarisaanerput nammineerluta qanoq oqaluttuarisinnaanerlutigu kinguaatsinnut takutikkusussimavarput. Siulittalu ilisimasaat oqaluttuatoqaativullu taamaaliornitsinni isumassarsiorfigisarpavut, Benedikte Bendo Schmidt oqarpoq.

Katersugaatit nunatta katersugaasiavianiittuutaalissasut

Tuukkaq Teaterip akiliisinnaajunnaarluni 1994-imi nalunaarnerata kingorna  aningaasaliiffigineqassaarpoq.

Reidar Nilssonili isiginnaartitsisarfimmi tassani isiginnaartitsissusiortarnini tamatuma kingornali ukiorpassuarni attakkaa, Erninguaq Poulsen oqarpoq.

Reidar Nilsson ukioq manna maajimi toquvoq, Tuukkaq Teaterillu illutaa tassa ingutserneqartussanngorpoq. Illup taassuma toqqaviata nalaa Danmarkimi pinngortitaq pillugu aqutsisoqarfimmit Naturstyrelsenimit oqarnerat naapertorlugu allanngutsaalineqassaaq.

Taamaammat isiginnaartitsissusiornermi najoqqutat isiginnaartitsinermilu atortut, atisat, kiinarpat immiussallu nunatta Nuummi katersugaasivianiittuutaalertussanngorlugit tassunga nassiunneqareerput.

Tunniunneqartut taakkua misissoqqissaarneqarlutillu immikkoortiterneqassasut, Nunatta Katersugaasiviata Allagaateqarfiani nakkutilliisoq pisortaa Aviâja Rosing Jakobsen oqarpoq. rlutik. Ilai allagaataagamik. Tunniunneqartut ilaat allagaataapput, taakkualu aamma misissoqqissaareerneranni immikkoortiterneqareerneranni nunatta allagaateqarfianut inississasut, taassuma ilanngullugu oqaatigaa. 

- Tuukkaq Teateriminngaanniit nassiussat nunatta oqaluttuarisaaneranut pingaaruteqarput. Tassami isiginnaartitsisarfik taavalu isiginnaartitsineq pillugit allagaatinik katersanillu allanik peqalissagatta.

- Taavalu aamma Nunatta Isiginnaartitsisarfiata oqaluttuassartaa ilassaqalerpoq, taavalu aamma misissuiffigineqarsinnaanngorluni ukiut ingerlaneranni Tuukkaq aallarteqqaarmalli isiginnaartitsisarnerup qanoq ineriartorneranik takussutissiisinnaammata, taanna oqarpoq

Oqaluttuassartaqaqisoq

Tuukkaq Teaterip anersaavata nunatta Nuummi katersugaasivianut ingerlateqqinneqartussanngornera, Erninguaq Poulsenip, Benedikte Bendo Schmidtip Rasmus Lyberthillu nuannaarutigaat.

- Oqalutturisaanera oqaluttuassartaqaqisoq tamaanga naggaserpoq nunatsinnullu ingerlateqqinneqartussanngorluni. Tamannalu isumaqaqaaq, Rasmus Lyberth oqarpoq.

Tuukkaq Teaterilu massakkut killiffimminut pingaaruteqarsimaqisoq, Rasmus Lyberthip aamma oqaatigaa.

- Reidarip naasuni sikkerartitaanut ilaallunga oqartarpunga. Tassa Tuukkami naasuni sikkerartunut ilaavunga, Rasmus Lyberth oqarpoq.

Erninnguaq Poulsen isumaqataavoq.

Tuukkaq Teaterimi taassuma inuunermi affaata missaani tassa ukiuni 30-ngajalluinnarni uigigaluata Reidar Nilssonip ulluinnarni inuunerannut ilaalluinnarsimavoq.

Erninnguaq Poulsenili Holstebromi maanna najugaqaraluarluni Tuukkaq Teateri uigigaluanilu suli uummateqarfigeqai.

- Massuma qimattussanngornera tussunngunaqaaq. Tuukkaq Teaterimi Reidarilu uannut isumaqarnikooqaat, inuunermalu sinnerani isumaqartuassallutik, taanna oqarpoq.