Nunatsinni isiginnaartitsisartoqarnermi pingaarutilik toqusoq

Kalaallinik isiginnaartitsisartoqatigiinnik Tuukkamik Danmarkimi pilersitsisoq, Reidar Nilsson, sapaatit akunnerata siuliani tallimanngornermi ullaassakkut toquvoq.

Reidar Nilsson 79-inik ukioqarluni Jyllandip kitaani Fjaltringimi angerlarsimaffimmini toquvoq.

Kalaallit isiginnaartitsisartoqarneranni maligassiuilluatoq aqqutissiuilluartorlu annaaneqartoq, isiginnaartitsisartoq Makka Kleist oqaluttuarpoq.

- Ataataaruppugut, taanna Reidar Nilsson pillugu taama oqarpoq.

Reidar Nilssonip isiginnaartitsisartoqartigiit 1975-mi pilersimmagit kalaallit pikkorissarfissaqalerlutillu isiginnaartitsisartunngorniarsinnaanngorput.

- Oqaatsivut, oqaluttuaativut kinaassuserpullu aallaavigallugit ataqqilluinnarlugillu sulisippaatigut.

- Taama ilinniarfiusinnaasut taamani pingaartinneqartarnerat sungiusimanngilarput, assorujussuarlu attortinnarlunilu tupaallannarpoq, nuannerlunilu ilinniartunngorluni, Makka Kleist oqarpoq.

Ilinniartuusimasut ingerlatitseqqittut

Tuukkat Teatret Danmarkimiittoq, kingorna isiginnaartitsisartoqatigiit Silamiut pilersinneqarnerannik malitseqarpoq. Nunatta Isiginnaartitsisarfia isiginnaartitsisartunngorniarfillu Nuummi 2011-mi pilersinneqarput.

- Nunatsinni isiginnaartitsisarnerup silarsuaani sunniuteqartorujussuunikuuvoq, soorlu Silamiut, Nunatta Isiginnaartitsisarfia, Nunattalu Isiginnaartitsinermik Ilinniarfia Reidar Nilssoneqanngitsuuppat pinngorsimanavianngikkaluarput. Taassuma ilinniartorisimasaasa sulineq ingerlateqqippaat, nunatsinnilu kulturimut tunngasunik siuarsaanerujussuaq pisinnaanngorpoq. Reidar qutsatissaqarfigeqaarput, Makka Kleist Danmarkimi maanna najugaqartoq oqarpoq.

Reidar Nilsson Tuukkaq Teatretip Jyllandimi Fjaltringimi illutaata saavani tallimanngornermi maajip ulluisa 17-ianni eqqaaniarneqarlunilu ilineqassaaq.