Nuuk Nordisk ullumi aallartissaaq: Tusarnaartitsinerit, eqqumiitsuliat kulturilu ulluni sisamani

Pikialaartitsinerit tamavinnut soqutiginartut. Nuuk Nordisk festivalimi eqqumiitsulianik kulturisiornernillu pisorpassuaqassaaq, festivalip aqutsisua Jonas Nilsson oqarpoq.
Isiginnaartitsinerit, oqallissaarinerit, tusarnaartitsinerit allarpassuillu. Nuuk Nordisk pikialaartitassarpassuaqassaaq. Assi © : Dida G. Heilmann / Nuuk Nordisk Kulturfestival
maajip 25-at 2023 09:59

Nuuk Nordisk kulturfestivali 2015-imili pilersitaasoq ullumikkumiit tallimassaa pikialaartitsissaaq.

Qilanaarisassaqaqisorlu, festivalimi aqutsisoq oqarpoq.

Unity – ataatsimoorneq ataqatigiinnerlu qulequtaralugit Nunani avannarlernit Issittumiillu tamaniit eqqumiitsuliornikkut kulturikkullu ulluni tulliuttuni sisamani pikialaartitassarpassuaqassaaq.  

- Ulluni tulliuttuni sisamani tusarnaartitsinerit, saqqummersitsinerit, qittatsitinerit, atuagassialerinerit, meeqqanut inuusuttunullu pisoqartitsinerit pikiarlaarfiussapput, festivalip aqutsisua Jonas Nilsson oqarpoq.

Tamavinnut eqqumiitsuliorneq kulturilu

Eqqumiitsulianik soqutigisaqarluartuunngikkaluanulluunniit ukioq manna tamanut festivali soqutiginarsarneqassasoq Jonas Nilssonip neriorsuutigaa:

- Eqqumiitsuliorneq kulturilu tamanut soqutiginarsarparput. Pikialaartitallu pisussani aalajangersimasuinnarnut utikattumik orniguttoqartannginnissaa anguniarparput.  

Aaqqissuisullu assigiinngisitaartunik pikialaartitsisoqaqqullugu assersuutigalugu oqalliffinnik, nuannaffinnik, meeqqanullu minnernut naleqqussakkanik aaqqissuipput.  

Nunani Avannarlerniit Issittumiillu pitsaanersiukkat

Pisoqartitsinerni inuusuttunut naleqqussagaqarnerunissaa Nuuk Nordiskimit aamma eqqumaffigineqarpoq.

Assersuutigalugu nunaqqatitta nipilersortartup Andachanip tusarnaartitsinissaa akeqanngilaq, Andachanillu erinarsugaa Kisivit, Spotify- mi 384.000-it sinnerlugit tusarnaarneqarsimavoq.

- Inuusuttunut isiginnaartitsivimmiittoqarnissaa pingaaruteqarsimaqaaq. Inuusuttut aaqqissuussap pitsaanngitsortaanik tuniinnarnagit, pitsaalluartumik taamaalilluta takusassinnissaat pingaartissimavarput, Jonas Nilsson nassuiaavoq.

Inuuteq Storch Nunatta Atuagaateqarfiani akeqanngitsumik oqaloqatigiartorneqarsinnaavoq, assiliortugaalu nutaavissuit saqqummersitaani Necromancerimiittut akeqanngitsumik aamma alakkarneqarsinnaallutik. 

Aqutsisup Sami nipilersortartoq Katarina Barruk Sverigemeersup takunissaa festivalimi qilanaareqaa. Inuiaallu Canadamit Sápmimeersoorpassuillu takunissaat immikkut qilanaarivaa:  

- Nuuk Kalaallit Nunaallu nunani avannarlernit issittumilu inuit suleqatigiittut naapinnissaat pingaartitaraarput. Pikialaarfittut kateriffiunissaa kulturerpassuillu naapiffiunissaa ilanngullugu.

Pisussat allattorsimaffii Nuuk Nordiskip nittartagaani takuneqarsinnaapput.