Kalaaleq assiliisartoq saqqummersitsisarfissuarmi tusaamasami saqqummersitsissaaq

Kalaallit ulluinnarni atugaat kulturiallu assitigut oqaluttuarisarneri, Inuuteq Storchip nunatsinni tusaamasaassutigaa.

Assilisaali nunarsuarmioqatitsinnit aamma takuneqarsinnaalissapput, tassa Inuuteq Storchip assilisai saqqummersitsisarfissuarmi tusaamaasami, Italiami illoqarfimmi Venedig-mi, aappaagu saqqummersinneqartunut ilaassammata.

Venedig Biennalen 2024-mi Danmarki sinnerlugu kalaallip eqqumiitsuliortup, 33-nik ukiullip assilisai ilaatinneqassasut, Naalagaaffiup Eqqumiitsuliat pillugit aningaasaateqarfianit toqqarneqarpoq.

- Ilaatinneqarnissara tusaqqaarakku eqqarsarpunga akisussaaffik annertooq tigullugu. Immaqa uannut angivallaartoq. Taamaattumik ilaatinneqarnissara ukiup massuma aallartinnerani tusarakku, akisussaaffik tamassumalu kingunerisinnaasai sivisuumik eqqarsaatigilluarpakka, Inuuteq Storch oqarpoq.

Inuuteq Storchip eqqumiitsuliortutut peqataanissaa oqaluttuarisaanitsinnut ilaasussanngorpoq.

Tassami Naalagaaffeqatigiit sinnerlugit nunarsuatsinni saqqummersitsisarfiit annersaasa ilaannut, kalaallimik aatsaat peqataasoqassaaq aamma assiliisartumik siullerpaamik peqataasoqassalluni.

Inuuteq Storchip assiliisarnermini qanga pissutsit maannalu pisut ataqatigiissittarmagit toqqarneqarsimasoq, assiliinermik eqqumiitsuliat pillugit suliniutinut ikorfartuisartut ataatsimiititaliaani ilaasortaq, Jakob Fenger Naalagaaffiup Eqqumiitsuliat pillugit aningaasaateqarfianut oqarpoq.

- Inuuteq Storch inuusuttuuvoq eqqumiitsuliornermik imaannaanngitsumik piginnaasalik. Qanga pisimasut maannalu pisut ataqatigiissinneqarsinnaanerinik assitigut oqaluttuallaqqissoq aamma nammineq inuiaqatigiillu kinaassusaat pillugit allat assilisaat namminerlu assilisaminik kinaassusiisartoq, Jakob Fenger oqarpoq.

Inuiaqatigiittut kulturerput pingaaruteqarpoq

Inuuteq Storchip peqataanissaa nunarsuatsinni saqqummersitsisarfissuarni allani suliaanik saqqummersitsisarnissaanut matut ammaassipput.

Namminerli pingaartitaa tassaavoq, nunatsinni eqqumiitsuliornermik suliallit nunarsuatta sinneranit ilisimaneqarnerulernissaat.

- Nunatsinni eqqumiitsuliortunik pikkorissorsuarnik ilaqarpugut. Taamaattumik peqataatinneqarninni kalaallit eqqumiitsuliortut ilisimaneqarnerulernissaat neriuutigaara, Inuuteq Storch oqarpoq.

Inuuteq Storchip Sisimiormiuusup ilisimaneqaatigaa, kulturitta kalaallit isaannit isigalugu oqaluttuaralugit takusassiarisarneri. Taamaaliornermini ulluinnarni pisut ilaqutariillu assilisai taamatullu qanga assilisat atorlugit takusassiarisarlugit.

- Qanga eqqumiitsuliortut ullumikkullu eqqumiitsuliortut pingaaruteqassusaat uppernarsigaangatsigu immitsinnut isiginnittaasitta ineriartorteqqinneqarnissaa takusuusisarparput, Inuuteq Storch oqarpoq.

Atuakkiaq "Mirrored", tarrarsornermik nutserneqarsinnaasoq, Inuuteq Storchip suliaraa. Tassani qanga assiliisartup kalaallinilu assiliisartut siullersaata, John Møllerip assilisai inuttaanullu tunngasoq atuakkiaralugu.

Inuuteq Storchip assilisai Københavnimi Nordatlantens Bryggenimi maanna saqqummersinneqarput, tassani John Møllerip assilisai aamma saqqummersinneqarlutik.

- John Mølleri kinaanersoq amerlasuunit ilisimaneqanngilaq. Taassuma assilisai kulruritsinnut ilaalluinnartut pillugit meeraanitsinnit ilinniartinneqareersimasussaagaluarpugut, Inuuteq Storch oqarpoq imalu naggasiilluni:

- Pingaaruteqarpoq kinaassuserput paasissagutsigu qanga oqaluttuarisaanerput ilisimassallutigu.