Nuummi Eqqumiitsulianik Saqqummersitsivik eqqumiitsuliorneq pillugu atuagaaqqanik saqqummersitsisoq
Meeqqat nunatta kulturia oqaluttuarisaaneralu pillugit ilisimasaqarnerulissapput.
Nuummimi Eqqumiitsulianik Saqqummersitsivik naqiterisarfik Epsilon suleqatigalugu Kalaallit Nunaanni eqqumiitsuliorneq pillugu atuagaaqqanik arfineq-pingasunik saqqummersitsivoq, atuagaaqqat meeqqat atuarfiinut tulluarsagaallutik.
Nuummi Eqqumiitsulianik Saqqummersitsivik tusagassiutinut nalunaarummi taama allappoq.
- Kalaallit Nunaanni eqqumiitsuliorneq pillugu atuartitsissutit piumaneqaqaat, taamaammallu atuagaarannguit arfineq pingasut nunatsinni eqqumiitsuliornermut tunngasut maanna kalaallisut qallunaatullu saqqummersinneri nuannaarutigeqaarput. Eqqumiitsuliorneq pillugu kalaallisut oqaloqatigiinnissamut periarfissiilluarput, atuartunut tamanut, Nivi Christensen, Nuummi Eqqumiitsulianik Saqqummersitsivimmi aqutsisoq oqarpoq.
Nunasiaasimanermi ajornartorsiutinik sammisaqarfiusoq
Atuagaaqqani Nuummi Eqqumiitsulianik Saqqummersitsivimmi aammalu Nunatta Katersugaasiviani katersat tunngavigineqarput.
Atuagaaqqat immikkut tamarmik Kalaallit Nunaanni eqqumiitsuliornermi aalajangersimasumik sammisaqarput. Sammisat 1850 sioqqullugu atortunik pinnersaasarnerminngaanniit ullutsinni eqqumiitsuliornermut, ilaatigut nunasiaateqartarnermut tunngasunut, siammasissuseqarput.
Atuagaaqqani ilaatigut eqqumiitsuliat inuiaqatigiit pillugit apeqqusersuisut sammineqarput, soorlu namminersornissamut naalagaaffeqatigiinnermullu tunngasut. Eqqumiitsuliortut assigiinngitsut, soorlu Inuk Silis Høegh, Pia Arke, Martin Brandt aamma Jessie Kleemann aallaavigalugit sammineqarput.
Atuagaaqqat Kalaallit Nunaanni meeqqat atuarfiinut tamanut agguaanneqarput
Atuagaaqqat naqiterisarfimmit Epsilonimit saqqummersinneqarput, katersugaasivinni paasissutissanik tunngasunik ”Vild med viden FOKUS”-ip ataani meeqqanut saqqummersitsisartoq.
Atuagaaqqat meeqqanut qulingiluanit aqqaneq marlunnik ukiulinnut tulluarsagaapput, kalaallisut qallunaatullu saqqummersinneqarlutik, atuagaaqqallu Ilinniusiorfik suleqatigalugu nunatsinni meeqqat atuarfiinut tamanut agguaanneqarlutik.
Atuagaaqqani arfineq pingasuni sammisat aalajangersimasuupput, ataasiakkaarlugit sammineqarsinnaasut imaluunniit atuagaaqqat sinneri aamma atorlugit sammineqarsinnaasut, oqallinnissamullu aamma periarfissiisoqarluni.
