Nuuk Nordisk Kulturfestival aallartittoq
![](/sites/default/files/styles/image_934x467/public/article_images/maannguaq_nnk21-2863.jpg?itok=EwI9WSl4)
Nunat Avannarliit Nuummi kulturisioqatigiinnerat Nuuk Nordisk Kulturfestival ualeq manna nalunaaqutaq sisamanut aallartippoq, Nunat Avannarliit kuturikkut ulluni sisamani tulliuttuni pikialaartitsissallutik.
Tusarnaartitsinerit, isiginnaartitsinerit, saqqummersitsinerit kulturikkullu allatigut pikialaartitsinerit misigineqarsinnaassapput.
Maannguaq Rosing, kulturikkut pikialaartitsinermi kajumissitsumininnik sulisinut aaqqissuussisoq kulturikkut pikialaartitsisoqarnissaanut neriulluarpoq:
- Naatsorsuutigaarput neriuutigaarpullu inoqarluassasoq, tassa inuppassuit billetsisereernikuupput, neriuppugut aqagu qaammat naariarpat suli billetsisisoqarnerulaassasoq, Maannguaq Rosing, Nuuk Nordisk Kulturfestivalimi nammineq kajumissutsiminik ataqatigiissaarisoq, taama oqarpoq.
Qulequtaq pisunut ataqatigiilersitsissasoq
Kulturikkut 2019-imi pikialaartitsisoqarmat qulequtarineqartoq tassaavoq "Angerlarsimaffik", ukioq mannalu qulequtaq tassaalluni "Angalaneq".
Coronavirusip nunatsinni aamma ajornartoortitsinera kulturisioqatigiissitsinissamut aamma sunniuteqarpoq, nalinginnaasumimmi ulluni arfineq-marlunni pikialaartitsisoqartaraluarluni ukioq manna ulluni sisamani taamaallaat pikialaartitsisoqassalluni.
Coronavirusilu Nuummi ulluni makkunani tuniluummat isiginnaariat tusarnaariallu akiuussuserneqarsimanermik uppernarsaammik peqartariaqassapput, imaluunniit tunillanneqarsimannginnermut uppernarsaammik takutitsisariaqassallutik.
Maannguaq Rosingili Nuuk Nordisk Kulturfestivalimut qilanaarpoq:
- Aap, tassa qilanaarpunga pissangallungalu aallartinnissaanut. Erinigikuullugu kiisami aallartilerpoq, Maannguaq Rosing oqarpoq, pisussarpassuillu akornanni pissanngatigisani ima oqaluttuaralugu:
- Qilanaarinerpaavara Jessie kleemannip, Jeanette Ehlersip Pia Arkellu Nuuk Kunstmuseumimi saqqummersitsinissaat, qilanaarnartorujussuuvoq, Maannguaq Rosing, Nuuk Nordisk Kulturfestivalimi kajumissutsiminnik sulisinut aaqqissuussisoq taama oqarpoq.
Ukiut allortarlugit Nuummi 2015-imili Nuuk Nordisk Kulturfestivalertitsisoqartarsimavoq. Festivali Kommuneqarfik Sermersuumit, Nunani Avannarlerni Piorsarsimassutsikkut Attaveqaammiillu pigineqarpoq.
Nuuk Nordisk Kulturfestivalimi pisussat suunersut festivalip nittartagaani takuneqarsinnaapput.