Qulaarpaa Tusagassiuutit kiffaanngissuseqarnerat tatineqartoq
- Pisunik isornartorsiusinnaassuseqarnerannik sanngiillisitsisinnaanasoraara, tamanna soorunami imminnut kingunerlutsitsisinnaammat. Taamaakkaluartoq oqaatigisariaqarpoq Kalaallit Nunaanni pissutsit taama inissisimammata, tusagassiorfiillu arlaannaanulluunniit attuumanngilluinnarnissaat ajornakusoortuulluni, taamatut inissisimanissaminnut aningaasassaqanngilluinnarmata, Transparancy International Greenlandip siulittaassua, Anita Hoffer, taama oqarpoq.
Aviisit tapiissutinik annaasaqarput
Tusagassiorfiit politikerinit qanoq pillarneqarsinnaanerinut assersuutissaq kingulleq tassaavoq, Naalakkersuisuusimasut Sermitsiaq.AG-mut tapiissutaasartunik atorunnaarsitsinerat, tusagassiorfiup qinnuteqaatiminik kingusinaarluni nassiussisimanera aammalu tusagassiorfiup sinneqartooruteqarsimanera innersuussutigalugu.
Suliffeqarfiup aningaasaqarneranut tunngatillugu tamanna isumatusaarnerussasoq, tusagassiorfiulli tungaanit isigalugu taamaanngitsoq Sulisitsisut peqatigiiffiannit GA-mit tikkuarneqarpoq.
Aamma atuaruk Aleqap aviisinut tapiissutit qularnartumik tunngaveqarluni atorunnaarsippai
Aamma atuaruk Sermitsiaq AG-p tapiiffigineqannginnissaa Aleqap aalajangiusimavaa
- Ajornartorsiutaasoq tassaavoq, aviisit qanoq iliortoqartaluarpalluunniit tapiiffigineqarnissaminnik pisariaqartitsimmata. Sinneqartoorutaasunut Sermitsiallu aningaasaqarneranut qanoq sunniuteqarsimanersoq eqqarsaatigalugu, sinneqartoorutaasut annertussusaat qanorlu sivisutigisumik taamatut ingerlasoqarsinnaanersoq naliliiffigineqartariaqarpoq. Tamannalu aarlerinartortaqartoq, GA-mi inatsisinut tunngatillugu siunnersortip aamma IT-mut, Tusagassiuutinut Attaqaqatigiinnermullu ataatsimiititaliami allattaasup Lars Krogsgaard-Jensenip oqaatigaa.
Taanna Hofferitulli isumaqarpoq tusagassiorfiit aningaasatigut pisariaqartitsinertik sanngiillissutigigaat.
- Ukiummi naajartulernerani pisariaqartitsilernissaq eqqarsaatigineqartarpoq tapiissutinillu pisariaqartitat matussuserneqarnissaat eqqarsaatigineqartarluni, Lars Krogsgaard-Jensen oqarpoq.
Isumaqatigiissutit sivisunerusumik atuuttussat
Tusagassiuutit pillugit nassuiaammi 2010-meersumi inerniliussat assingalugit isumaqarpoq sivisunerusumik isumaqatigiissuteqartarnikkut tusagassiorfiit kiffaanngissuseqarnerisa politikkikkut akuliuffigineqannginnissaa qulakkeerneqarsinnaasoq.
- Inatsisiliortut tungaannit aningaasalersueriaatsimik ukiunut arlalinnut atuuttussamik suliaqartorsinnaappat tamanna tusagassiorfinnut iluaqutaassagaluarpoq. Ukiunulli pingasunut, tallimanut qulinulluunniit atuuttuussaassanersoq oqaatigisinnaanngilara, Lars Krogsgaard-Jensen oqarpoq.
Tusagassiorfiit kiffaanngissuseqarnerulernerisa saniatigut aningaasaatiminnik nammineerlutik ukiunut arlalinnut pilersaarusiornissaannut annertuumillu aningaasalersuinissamut pilersaarusiornissaannut ilaqutaassasoq aamma oqaatigaa.
Imminut killilersuisoqalersinnaanera aarleqqutigaa
Anita Hofferip Transparancymeersup erseqqissaatigaa, tusagassiorfiit kiffaanngissuseqarnerisa qulakkeernissaannut qanoq iliortoqarsinnaanera akisinnaanagu, siulittaasulli naqissuserpaa tusagassiorfiit isornartorsiuillutik tusagassiornermikkut pissaanilinnit pillagaanissartik aarleqqutigissanngikkaat pingaaruteqarluinnartoq.
- Tusagassiorfiit tusagassiamik kinguneqartitsisinnaanerannik aarleqquteqannginnissaat pingaaruteqarluinnarpoq. Taamaammat kiffaanngissuseqarnissaat pingaaruteqarpoq, taamaanngippammi imminnut killilersulersinnaapput paasissutissallu uagut pisariaqartitavut saqqummiunneqanngitsoorlutik. Taamaammat kiffaanngissuseqarnissaat pingaaruteqartupilussuuvoq, Anita Hoffer taama oqarpoq.
