Aleqap aviisinut tapiissutit qularnartumik tunngaveqarluni atorunnaarsippai

Aleqa Hammondip aningaasaqarnermut ataatsimiititaliaq tusaanngitsuusaarpaa, sapaatip-akunnerata siuliani avammut nalunaarutigigamiuk Sermitsiaq.AG tusagassiuutinut tapiissutinik aningaasaliiffigineqartarunnaassasoq.
 
AG-mi ullumi saqqummersumi atuarneqarsinnaavoq aningaasaqarnermut ataatsimiititaliami ilaasortat tusatsiarsimagaat, Sermitsiaq.AG-p qinnuteqaataa akuerineqarsimanngitsoq. Taamaammat ataatsimoorlutik Aleqa Hammondimut allapput pisut aaqqiivigeqqullugit, kingornali tusagaqaqqissimanngillat. Aatsaat Aleqa Hammondip tusagassiorfinnut nalunaarmat tapiissutit unitsinneqartut.

AAMMA ATUARUK Sermitsiaq.AG-p tapiissutisiarisartakkani annaavai

Nassuiaatigineqarpoq tusagassiuutit pineqartut tapiissutinik pinngikkaluarlutik sinneqartooruteqarmata.
 
- Tapiissutit atorneqartarput suliffeqarfinnut pisariaqartitsisunut, suliffeqarfinnut ingerlalluartunuunngitsoq, naalakkersuisunut siulittaasuugallartoq Steen Lynge KNR-imut sapaatip-akunnerata siuliani oqarpoq.
 
Aningaasanulli inatsimmi allassimasoqanngilaq tapiissutit aningaasakilliortunut tunniunneqartarnissaannut tunngasumik.
 
Paarlattuanilli allassimavoq ”Aningaasaliissutit qinnuteqaateqarsimasut akuerisat akornanni agguaanneqassapput."
Taamaammat Naalakkersuisut pisussaanngillat aningaasat ilumut tunniunneqassanersut nalilersuiffigissallugu. Aningaasat qinnuteqaateqartunut piumasaqaatinillu naammassisaqartunut agguaannissaat suliassaraat, piumasaqaatimmi ima oqaasertaqarput:
 
- Qinnuteqartunut piumasarineqarpoq sapaatit akunneri tamakkerlugit nuna tamakkerlugu aviisinik kalaallisut danskisullu naqitanik saqqummertoqassasoq.
 
Taamatullu piumasaqaateqartoqarnera Sermitsiaq.AG-p, Sermitsiaq.AG-llu kisimi naammassisinnaavaa.
 
Aningaasaqarnermut ataatsimiititaliami siulittaasup tulliata Gerhard Petersenip AG-mut oqaatigaa ataatsimiititaliap Aleqa Hammond akissuteqaqqullugu saaffigisimagaluaraa.