Tusagassiuut: Nunatsinni inersimasut tamarmik inuiattut ullorsiortinnata akiuussuserneqarnissamik neqeroorfigineqassapput
Nunatsinni inersimasut tamarmik inuiattut ullorsiortinnata coronamut akiuussuserneqarnissamik neqeroorfigitinnissartik naatsorsuutigisinnaavaat.
Nunatta nakorsaanera, Henrik L. Hansen, sermitsiaq.ag.-mut taama oqarpoq.
Nunatsinni akiuussutissalersuineq
- Akiuussutissat puiaasaarakkat nassiussat siulliit 1305-iupput. Taakkua ukiortaap kinguinnngua tikipput.
- Nassiusst tullii puiaasaaqqat 975-iupput. Taakkua sapaatit akunnerisa aappaanni tikipput. Taakkunannga Qaqortumi, Aasianni Sisimiunilu inutaasut peqqinnissaqarfimmilu salliullutik sulisut kapineqarput.
- Nassiussat pingajui aamma puiaasaaqqat 975-iupput.
- Akiuussutissaq – 70 gradip aamma -80 gradip akornanni nillertigisumiitinneqassaaq. Taamaammat assartoruminaappoq.
- Akiuussutissaq, akuerineqarluni nunatsinnut nassiunneqartussaaq, tulleq amerikamiut nakorsaasiorfiata Moderna ineriartortitaraa.
- Innuttaasut 16-ileereersimasut tamakkerlugit inuiattut ullorsiortinnata neqeroorfigineqareersimanissaat piviusorsiorsinnaavoq. Tassa juunip ulluisa 21-at nallertinnagu, Henrik L. Hansen tusagassiuummut oqarpoq.
Innuttaasut 16-ileereersimasut katillutik 44.000-t missaat akiuussuserneqarnissamik neqeroorfigitissasut, Nunatta Nakorsaaneqarfia ilisimatitsivoq. Innuttaasut ataasiarlutik akiuussuserneqarsimasut katillutik maannamut 3.655-iupput, marloriarlutillu akiuussuserneqarsimasut 1187-iullutik.
AAMMA ATUARUK Akiuussutissat AstraZenecameersut Danmarkimut tikipput
Coronamut akiuussutissat nunatsinnut pilersaarutit malillugit tikittussaagaluit tikinngitsoorput. Tamanna coronamut akiuussutissat nunarsuaq tamakkerlugu piumaneqarnerujussuannik peqquteqarpoq – Danmarkimullu tikittussaagaluit tamannarpiaq aamma peqqutaalluni tikinngitsoorput.
Illoqarfinni anginerni akiuussusiinerit pileruttorput. Issittumi Sakkutooqarfiup umiarsuaa akiuussutissanik peqqinnissamillu sulialinnik Paamiunut Qeqertarsuatsiaanullu apuusseqataaqqammerpoq.