Tusagassiorfik: USA-mut niuernikkut isumaqatigiittoqarsinnaanera Kinamit qularineqartoq
USA-mut præsidentimut Donald Trumpimut niuernikkut ungasissoq isigigalu isumaqatigiittoqarsinnaannersoq Kinami naalakkersuisut qularaat.
Nutaarsiassaqartitsivik Bloomberg tusarfimmik innersuussaqanngitsoq taama allaserisaqarpoq.
Kinami atorfillit Beijingimi tikeraartunut allallu tusaasarinngisassaanik oqaloqateqarneranni oqaatigineqarsimavoq Kina niuernikkut akerleriiffiusut pillugit tunniutiinnarumanngitsoq.
Trumpip eqqarsaqqaarnani iliuuseqartarnera aamma isumaqatigiissummik sapaatini akunnerni aggersuni atsioqatigiittoqarnissaanut tunuarteratarsinnaaneranut aarlerinartoqarnera Kinami naalakkersuisut aamma ernumanartoqartippaat.
AAMMA ATUARUK Niueqatigiinnikkut qalliuniunneq aningaasarsiornermut qajannarsisitsisoq
Aningaasaqarneq pillugu nutaarsiassiisarfinni nutaarsiassiisartuni sallersaasoq, Bloomberg taama allaaserisaqarpoq.
Pisoqarnerali alla aamma isumaqatigiissuteqarnissamut akornusiivoq.
Chilemi eqqissiviilliortoqarnera pissutigalugu nunat Manerassuup nalaanniittut peqatigiiffimmi Apecimi ataatsimoorlutit ataatsimiinnissaat taamaatinneqartoq, Chilemi præsidentip, Sebatian Piñerap pingasunngormat nalunaarutigaa. Ataatsimiinnerit Santiagomi novembarip 16-ianni 17-iannilu ingerlanneqartussaagaluarput.
Ataatsimiinnermilu tassani Trumpip kinamiu suleqatini, Jo Pi Jinping naapittussaagaluarpaa.
AAMMA ATUARUK USA-p Kinallu isumaqatigiinniarnerit unittooqqasut nangeqqinnialeraat
Trumpip Kina niuernermut isumaqatigiissutaagallartumik Santiagomi atsioqatigiissuteqarfigisinnaassallugu sapaatip akunnerani matumani oqaatigaa.
Chile Apecimi ataatsimiinnermik aaqqissuussisussatut taarserneqarnissaa USA-p isumaliutigaa. Matumanilu Hawaii Alaskaluunniit periarfissaasinnaasutut oqaatigineqarput.
Taamaaliortoqassanersorli nalunarpoq, taamaattoqassappallu USA nunallu 21-t peqataasussat qaammatini arlalinni piareersartariaqarput.
Isumaqatigiissutaagallartussamik tuaviuussisoqarusunngitsoq, Kinami atorfillip pisumut ilisimasaqartup oqaatigaa
- Siunnersioqatigiinneq allorarnikkut pisariaqarpoq, atorfilik oqarpoq.
