Tusagassiorfik: Obama Harrisimut tapersersuinerminik nalunaaruteqangajalissangatinneqarpoq
USA-mi præsidentiusimasup Barack Obamap Kamala Harrisip demokratit sinnerlugit USA-mi præsidentimut qinigassanngortinneqarneranut tapersersuinini nalunaarutigingajaleraa ilimagineqarpoq.
Harris Obamalu qanimut arlaleriarlutik sapaatiummalli oqaloqatigiinnikuunerannik nalunaaruteqartoqareersorlu taama pisoqarpoq.
Tusarfiit sisamat, Harrisip Obamallu oqaloqatigiinnikuunerannik ilisimannittut NBC Newsimut taama ilisimatitsipput.
- Harrisip qinigassanngortinneqarnissaa Obamap tamakkiisumik tapersersorpaa, tamanullu tamanna nalunaarutigingajalerpaa, tusarfiit sisamat taakku NBC Newsimut oqarput.
Obama USA-mi demokratini nuimasuni Kamala Harrisip præsidentimut qinigassanngortinneqarnissaanut tapersersuinermik suli nalunaaruteqanngitsunut ilaavoq.
Tusarfiit ilaata NBC Newsimut oqarnera naapertorlugu Obamap Bidenimit pingaarneruniannginnini tassuuna takutinniarpaa, pingaartumik Bidenip præsidentip illorsuanit oqalugiarnissaa sioqqullugu.
Joe Bidenip præsidentimut qineqqusaarunnaarniarluni sapaatiummat nalunaarutigereeraalu, Kamala Harris USA-mi demokratit akornanni katersuuffiujartornerulerpoq, Obamallu tamanna akornusersorusunngilaa.
Barack Obamap nuliata Michelle Obamap, Kamala Harrisip præsidentimut qinigassanngortinneqarnera tapersersoraa, tusarfiit sisamat ilaat marluk oqaatigaat.
