Politikerit: Tupaallannanngilaq ataqqinninnerunanilu

USA-p præsidentiata Donald Trumpip nunatsinnut immikkut aallartitamik atuuffinitsitsinini sapaatiummat nalunaarutigaa.

Atuuffinitsinneqartoq, USA-p naalagaaffiisa ilaanni Louisianami guvernøri, Jeff Landry, nunatta USA-mut ilanngutitinnissaa sulissutigissallugu oqarpoq.

Tamanna Trumpip nunatsinnik aqutsilernissamut kissaatiminik pimoorussineranik takussutissaasoq USA-p nunanut allanut politikkianik ilisimatusartoq oqarpoq.

Taamaattoqarneralu sakkortugaluarluni tupaallannanngitsoq, Inatsisartuni nunanut allanut sillimaniarnermullu ataatsimiititaliami ilaasortanit partiini naalakkersuisoqatigiinniittunit tupaallaatigineqanngilaq.

- USA-p nunatsinnik soqutiginninnera nutaarsiassaanngilaq. Nunarput pigilerumallugu. Aatsaanuna maannakkut taama ammatigisumik oqartartumik præsidenteqartut, Inuit Ataqatigiinneersoq Pipaluk Lynge taama oqarpoq.

- Arlaleriarluni taamaasiortareermat, Amerikap præsidentiata oqariartuutai tupaallannartortaqanngillat. Aamma suna pillugu taamaaliornera nalunngilarput, Siumumeersoq Erik Jensen taama oqarpoq. 

- Taassuma pilersaarutaanut ilaaginnarneranik misigeqqippunga. Una nunatsinnik tiguaanissamut kissaateqarneranut alloriarnerusoq. Uannut tupaallannanngilaq, Demokraatineersoq Justus Hansen oqarpoq.

Ataqqinninnginnerusorigaat

Ataatsimiititaliami partiit naalakkersuisoqatigiinniittut tupaallanngikkaluarlutik atuuffinitsitsineq ilungersunarsoraat. 

- Taassuminnga atuuffinitsitsinermini taama sakkortutigisumik iliornera nunatsinnik ataqqinninngilluinnarneruvoq, Justus Hansen oqarpoq.

Trumpip nunatsinnik soqutiginninneranut atatillugu oqaaseq "ataqqinninnginneq" siullermeerluni atorneqalinngilaq. Aamma allanngortoqanngippat, oqaaseq tusaqattaassagipput, Erik Jensen oqarpoq.

- Ataqqineqarnissarput pisariaqartipparput, aamma inuiaat kalaallit siunissartik namminneq qanoq ilusilersussanerlugu namminneq aalajangigassarigaat, taanna uteqattaartuassavarput. Aamma taanna kisiat qitiutillugu oqariartortarnissarput isumaqarpunga ataatsimooruteqqissaartariaqaripput, Erik Jensen oqarpoq. Naalakkersuisut USA-mik oqaloqateqarnissaat taassuma kissaatigaa. 

Taassuma USA-p Danmarkimut aallartitaata, Ken Howeryp, qanittukkut tamaaniikkami oqaasii eqqaamavai.

- Ambassadørip qanittukkut oqariartuutai allaanerupput, tassani ataqqinnippalaarneq tusaagaluarparput. Kisianni ullualuit qaangiummata aamma allarluinnarmik tusaqqillugu. 

"Naamerluinnaq"

Nunatta inuisa siunissaminnut namminneq aalajangiisinnaassuseqarnerat ataqqillugu aallartitaq tamaaniinnermini oqarpoq. Aamma nunatsinnik ataqqinninnermik USA-mit oqaaseqartoqareeraluartoq, aamma Pipaluk Lyngep eqqaamavaa.

- Trumpip ukioq manna oqalugiarnermini nammineq oqaatigigaluarpaa, ataqqilluta aalajangerniakkagullu ataqqillugit. Ataasiulluta oqaatigereeraluarparput kalaaliuniarpugut, amerikamiuunianngilagut qallunaajunianngilagut. Taanna tusaanianngitsoorsimaneranik naqissusiineruvoq, naak oqaraluarluni ataqqilluta. Ataqqinninnginnermik takutitsineruvoq.

Immikkut aallartitamik atuuffinitsitsineq iliuusiusoq nutaaq Erik Jensenip erseqqissaatigaa. Taassuma ataqqinninngitsutut isigisaminut ataatsimoorluni kiinnernissaq pingaaruteqarsoraa.

- Inuiaat kalaallit naqisimaneqarlutik amerikamut ilanngutitinneqarnissamik eqqarsaateqartunut taakkununnga naamerluinnaq.

Ataatsimoornissaq pisariaqarsorigaat

Nunatta iluani ataatsimoornissaq aamma Pipaluk Lyngep pingaaruteqarsoraa. Kisianni aamma nunanik allanik ataatsimooqateqarnissaq pingaaruteqartoq ilanngullugu oqaatigaa.

- Nunat suleqatigut naleqartitatsinnik naleqartitsisut, nunap nammineq inuisa oqartussaassuseq paarinissaannik ataqqinnittut, EU-kkut, Canadap, Islandip, Savalimmiormiut suleqatiginissaat aatsaat taama pingaaruteqartilerpoq.

Tamatumunngalu nunatta nunanut allanut politikikkut oqartussaaffeqarnerunissaa kissaatiginartoq taanna isumaqarpoq.

Nunanut allanut suleqateqarnerunissaq pingaaruteqartoq aamma Justus Hansen isumaqarpoq.

- Amerlanerulluta akerliliisinnaagutta una arlaatigulluunniit akuersaarneqarsinnaanngitsumik oqaaseqarnissaq ajornannginnerussaaq, Justus Hansen oqarpoq.

Kisianni uivinnginnissaq pingaaruteqartoq Erik Jensen oqarpoq.

- Uagut inuiaat kalaallit ataatsimoorluta, toqqissilluta nalliuttut atussagigut kissaatiginartorujussuuvoq.