Innuttaasut nipaat: – Naamik akuerisinnaanngilluinnarpara
Louisianami guvernøri Jeff Landry Kalaallit Nunaannut aallartitatut USA-p præsidentiata Donald Trumpip toqqarlugu Trump nammineq inoqatinut attaveqaatimini Truth Social-imi sapaatip unnuaani allappoq.
Isumannaallisaanermullu tunngasut pillugit USA-p Kalaallit Nunaat tiguartariaqaraa Donald Trump arlaleriarluni oqaatigisareerpaa.
Tamannalu pillugu Nuummi innuttaasut ilaasa qanoq isumaqarnerat KNR-imit paasiniarparput.
Donald Trump Kalaallit Nunaannut immikkut aallartitamik toqqaalluni ataasinngornerup unnuaani nalunaarpoq tamanna qanoq isumaqarfigaajuk?
- Naamik akuerisinnaanngilluinnarpara. Apereqqaanngilaatigut taamaattoqarsinnaanersoq. Ataqqinninngilluinnaaqqissaartoq taanna uanga akuerisinnaanngilara, Sara Lyberth oqarpoq.
Sooruna?
- Uagut kalaallit inuiattut nammineq isumaqarpugut, aamma imaanngilaq ooriutilissuugami qanorsuaq iliorsinnaalluni. Taamaattoqarsinnaanngilaq. Ataqqisariaqarpaatigut, taanna oqarpoq.
Donald Trumpip nunatsinni isumannaallisaaneq pillugu USA-p nunarput tiguartariaqarneranik oqaaseqaqqinnera qanoq isumaqarfigaajuk?
- Soorunami nalunngilara qallunaat Europalu suleqatigiinnerat nukittorsarneqartoq. Taakkununnga atarusunneruvunga USA-mut atarusunnanga.
Trump nunarput pillugu arlaleriarluni oqaaseqartarpoq, Trumpip juullilernerani taamannak oqaaseqarnera, qanoq misigisimanarpa?
- Annerusumik tigunngilara. Allaannginnami eqqarsarsinnaanera killeqartoq – uanga taamatut isumaqarpunga. Itinerusumik eqqarsarsinnaanngilaq, inuiaat namminneq nunavimminni ineriartortut ataqqinngilluinnarpai, taanna oqarpoq.
Kim Jakobsen - Sara Lyberthip akerlianik – Trumpip oqaaseqarnera eqqarsaatigivallaanngilaa juullisiornissanimi eqqarsaatigineruaa.
Donald Trump Kalaallit Nunaannut immikkut aallartitamik toqqaalluni ataasinngornerup unnuaani nalunaarpoq tamanna qanoq isumaqarfigaajuk?
- Annerusumik imatut eqqarsaatigivallaarneq ajorpara. Kisianni soorunami siunissamut ungasinnerusumut eqqarsaatigisinnaavara ”aningaasat” investeriinerusoq, taanna oqarpoq. Trumpiminngaanniit – tassunga tunnganerusimassaaq. Neriuinnarsinnaavunga arlaatigut nunatsinnut iluaqutaasinnaasumik iliuuseqarumaartut,
Donald Trumpip nunatsinni isumannaallisaaneq pillugu USA-p nunarput tiguartariaqarneranik oqaaseqaqqinnera qanoq isumaqarfigaajuk?
- Uagut nunarput nammineertussaagaluarami ilaa. Taamatut paggatassiissutaannginnatta. Aamma nunaavugut inuiaqatigiiullutalu misigissusillit imatut arsaaqqatut milorujussaaqattaartussaannginnatta – taammaammat taanna uanga torragivallaanngilara.
Trump nunarput pillugu arlaleriarluni oqaaseqartarpoq, Trumpip juullilernerani taamannak oqaaseqarnera, qanoq misigisimanarpa?
- Misigissutsinnut attuivallaanngilaq pissutigalugu uanga nammineq ukkatarisara soorunami ilaquttakka juullisioqatigisussaavakka nunatta avataaniittut imaluunniit avatinni pisut uannut attuivallaarneq ajorput. Taamaammat arlaatigut aalassassutiginngilara pissutigalugu asasakka ilaquttakka ilagisussaagakkit, Kim Jakobsen oqarpoq.
Dorthe Berthelsen-Kristensen-ip Trumpip suna siunertarineraa ernummatigaa.
Donald Trump Kalaallit Nunaannut immikkut aallartitamik toqqaalluni ataasinngornerup unnuaani nalunaarpoq tamanna qanoq isumaqarfigaajuk?
- Tassa ullaaq iteqqammerlunga nutaarsiassat atuarakkit, taava eqqarsaammerpunga piniinnarpoq kiisa atorfinitsitsivoq, taanna eqqarsaammerfigaara siullertut piniinnarluni pinera, taanna oqarpoq.
Sooruna?
- Tassami ilaa siuliani pisoqaqqaarmalli kiisa uunga killippoq kiisa toqqaallunilu pivoq, atorfinitsitsilluni kalaallit nunaannut pillugu oqaaseqartartussamik immaqaluunniit akisussaasussamik
Donald Trumpip nunatsinni isumannaallisaaneq pillugu USA-p nunarput tiguartariaqarneranik oqaaseqaqqinnera qanoq isumaqarfigaajuk?
- Siullertut Ernumaammilaarsinnaavunga ugguunatigut uagut kalaallit nammineq kultureqarlutalu pivugut kisianni namminersulivinnikuunngilagut taava tassunga pilaarpunga soorlu namminersulivissimannginnerput kalaallit Nunaattut taanna atorluarniarsarineraa arlaatigut putusiorluni. Tassaniilaarpunga, Dorthe Berthelsen-Kristensen oqarpoq.
Trump nunarput pillugu arlaleriarluni oqaaseqartarpoq, Trumpip juullilernerani taamannak oqaaseqarnera, qanoq misigisimanarpa?
- Tassa eqqarsaammernarpoq sunaana ilaa anguniaraa ukio naannginnerani arlaatigut immaqaluunniit ukiup aallartilaarneraniuna arlaannik pisoqarniartooq tassami qanoq pinerpoq taamatut.
FN ilannguttariaqartoq Klaus Frederiksen isumaqarpoq.
Donald Trump Kalaallit Nunaannut immikkut aallartitamik toqqaalluni ataasinngornerup unnuaani nalunaarpoq tamanna qanoq isumaqarfigaajuk?
- Kanngunartorujussuarmik nalunngilarput iliuuseqartartoq oqariartuuteqartartoq aamma kisianni qanorluunniit eqqarsartigigaluaraanni Pituffik eqqaaneqartariaqarpoq, sooruna taamatut nunatsinni qunusaarilluni piinnarmat akiumaneqanngitsoq Pituffimmi isumaqatigiissutit pillugit eqqarsaatigineqaqqittariaqartoq.
Sooruna?
- Inuk taama silanngajaartigisoq utoqqatsernianngilanga oqaaseq taanna atorakku sakkukinnerusumik isummerfigineqarsinnanngilaq.
Donald Trumpip nunatsinni isumannaallisaaneq pillugu USA nunarput tiguartariaqarneranik oqaaseqaqqinnera qanoq isumaqarfigaajuk?
- Isumaqarpunga kialluunniit nunarsuarmioqatigiit tamarmik matumanilu FN sassartariaqalersoq oqarluni taamaaliortoqarsinnaannginneraalluni.
Trump nunarput pillugu arlaleriarluni oqaaseqartarpoq, Trumpip juullilernerani taamannak oqaaseqarpoq, misigissutsit suuppat?
- Isumaqarpunga uanni juullilernera apeqqutaanngitsoq inuup eqqarsartaasia nunarsuarmiut tamarmik paasereersimalerunarpaat qanoq ittuusoq, taanna oqarpoq.
