Tunumi ilinniartitsisussaaleqineq: Isertumi ilinniarsimasunik ilinniartitsisoqanngilaq

Tasiilami Alivarpimmi sulisut pingajorarterutaat qallunaajullutillu timelæreriupput. Akerlianilli Nuummi ilinniartitsisussaaleqisoqanngilaq, allaat ilinniartitsisutut ilinniarsimasut ilinniakkatik atorlugit arlallit sulinngillat.

Tunumi ilinniartitsisussaaleqineq ukiuni kingullernik ajornartorsiutaajuartarmat, ilinniartitsisut immikkut ajunngitsorsiassaqartittalerlugit aaqqiisoqarpoq. Ilinniartitsisussaaleqinerli annikilliartunngilaq.

Ilinniartitsisut ukiut tamaasa sulinngiffeqarlutik angalanissaannik periarfissaqarput, aamma ukiunik pingasunik atorfeqareernerinik aningaasanik tigusinnaasaanik ileqqaartoqartarpoq, taakku saniatigut:

- Aamma nunaqarfimmut suliartortussat ineqarnermut akiligassaanik tapiiffigineqartarput, Kommuneqarfik Sermersuumi atuarfeqarnermut pisortaq, Riikki Grønvold oqarpoq.

-Kisianni immaqa avinngarusimanera peqqutigalugu inuit ilaquttaminnik maqaasillutik soraarniuteqaqqittuaannarput.

Tasiilami Alivarpimmi ilinniartitsisut katillugit 62-iupput, taakku pingajorarterutaat qallunaajullutillu timelæreriupput.

- Timelærerit atuartitsinerisa nalaani internettimut attaveqaat atorlugu ilinniartitsisumik peqataatitsilluni ilinniartitsisoqartalernissaa aaqqiissutissatut isigigaluarparput, kisianni internettip arriinnera peqqutaalluni taamaaliornissaq piviusunngortikkuminaatsorujussuuvoq.

- Kisianni siunissami tamanna aaqqiissutaajumaartoq takorloorparput. 

Sermiligaami ilinniartitsisutut sulisuni arfineq pingasuusunik ataasiinnaq ilinniartitsisutut ilinniarsimasuuvoq. Isertumi ilinniartitsisutut ilinniarsimasunik ilinniartitsisoqanngilaq, tamaani marlunnik sulisoqarpoq. Tamannali akiorniarlugu ungasianiit atuartitsisalenissaq aaqqiissutissatut pilersaarutaagaluarpoq, kisianni:

- Tunumi internettimut attaveqaatip arriippallaarnera peqqutigalugu, ipadikkut atuartitsinissamut atorsinnaanngilaq, siunissamili taamaaliorsinnaalernissarput neriuutigaarput, Riikki Grønvold oqarpoq.

Politikerit akuliuttariaqartut

Tasiilami nunaqarfiinilu ilinniartitsisussaaleqinerup annikillisinneqarnissaa eqqarsaatigalugu ilinniaritsisunik angalaartunik kitaaniit tunumut suliartortitsisalernissaq aqqutissatut atuutilerneqarsinnaasoq, Kommuneqarfik Sermersuup ilassutigaa.

Atorfiilli inuttaqanngitsut qinnuteqarfigineqarlutillu inuttalerneqarpata, tamanna pisariaqanngitsoq, ilassutigineqarpoq. Tasiilami nunaqarfiinilu ilinniartitsisutut atorfiit aprilip ulluisa sisamaata tungaanut qinnuteqarfigineqarsinnaapput. Qinnuteqartulli naammanngippata, ilinniaritsisunik angalaartunik pilersitsisoqarnissaanik politikerinut noqqaassutigineqassaaq.

- Nalunngilarput Nuummi ilinniartitsisunik ilinniarsimasunik ilinniartitsisutulli sulinngitsunik amerlasuunik peqartoq. Tamakku qanoq ilillugit nunatta sineriaanut siammarterneqarsinnaanersut, politikerit aqqutissiuuttariaqarai isumaqarpunga, Riikki Grønvold oqarpoq.

Ittoqqortoormiini ilinniartitsisussaaleqisoqanngitsoq

Ittoqqortoormiit aamma ilinniartitsisussaaleqiffiunikuuvoq. Ukiunili kingullerni ilinniartitsisussaaleqiffiujunnaarpoq. Tamanna atuarfimmi aqutsisut iliuuseqaqatigiinnerisigut anguneqarpoq.

- Ittoqqortoormiit atuarfiani aqutsisut iliuuseqarlutik aaqqiineratigut nunagisaq qimannagu ilinniartitsisunngorniarsinnaaneq eqqunnikuuaat. Tamassuma aamma kingunerisaanik ilinniartitsisussaaleqineq qaangerneqarnikuuvoq.

Nuup avataaninnganiit najugaq qimannagu ilinniagaqartoqarsinnaavoq. Ilinniartoq Ilinniarfissuarmi ilinniartitsisunngorniartut nalinginnaasumik ingerlariaaseqarlutik ingerlasut holdiisa ilaannut akuutinneqartassaaq. Ilinniartoq ulluinnarni atuarfimmi timelæreritut suliffeqassaaq, internettimullu patajaatsumik attaveqaateqassalluni.