Tunillatsissimasup corona pillugu malittarisassat malissimanngilai
Aasianni covid-19-imik tunillatsissimasumik paasisaqartoqarnerata kinguneratigut pingasunngornermi unnukkut ulapputtoqarpoq. Nunatsinnut tikinnermit ullut tallimassaani misissorteqqittup tunillatsissimanera paasineqartoq, Naalakkersuisut siulittaasuata, Kim Kielsenip (S) oqaatigaa.
- Tunillatsissimasoq imminni pulaartoqartarsimavoq, pulaarsimasorlu pulaarnermi kingorna Nuummut angalasimalluni, Kim Kielsen oqarpoq.
Tamanna pissutigalugu nakorsaaneqarfiup politiit suleqatigalugit pisoq misissuiffigaat, misissuinerullu matumani takutippaa tunillatsissimasoq Aningaasaqarnermut Akileraartarnermullu ataatsimiiititaliami sinniisumut ataatsimiititaliamik pingasunngornermi ataatsimeeqatiginnittumut qanittumik attuumassuteqartoq.
AAMMA ATUARUK Nyt tilfælde af covid-19 i Aasiaat
- Nunatsinni tunillatsittoqarnissaanut qanoq ilimanaateqartoqartiginersoq matumani takutinneqarpoq. Nassuerutigisariaqarparput taamaattut amerlanerujumaartut, nakorsaaneq, Henrik L. Hansen oqarpoq.
Nakorsaanerup tunillatsissimasoq covid-19-imik tunillatsissimanermik takussutissaqarnerarpaa.
Tunillatsissimasup malittarisassat malissimanngikkai Naalakkersuisut siulittaasuata nassuiaatigaa.
- Tunillatsissimasoq angerlarsimaannaqqusaanermi nalaani pulaartoqarsimasoq ippassaq paasineqarpoq. Taamaattoqartussaanngilaq, tamanna ilinniarfigissavarput. Taamaammat malittarisassat suli sukannernerusumik malissavagut, Kim Kielsen oqarpoq.
- Tikeqqammersumik nalunnhgisaqaruit taava pulaassanngilatit.
Anersaartuutinut illersuut aniguit pisiniaruillu eqqaamajuk
Covid-19-imik tunillatsittoq kingulleq pissutigalugu nakorsaanerup angerlarsimaannarnissamut malittarisassat uteqqittariaqarpai:
- Danmarkimit Islandimiilluunniit tikittut angerlarsimaannartarnissaannut malittarisassat malinneqarnissaat sukannerusumik innersuussutigaarput. Taamaammat ilaquttanit pulaartoqassanngilaq, allatut inissisimanissaq iluaqutaasinnaanngilaq.
AAMMA ATUARUK Aasianni coronamik tunillatsissimasoqartoq: Aningaasaqarnermut ataatsimiititaliamut ilaasortat angerlarsimassasut
- Imaapporli allanit ikiuisinnaasoqanngippat anilluni pisiniartoqarsinnaavoq. Taamaattoqassappalli anersaartuutinut illersuutit atorneqarnissaat innersuussutigaarput.
- Taamalu illoqutigisanut tunngatillugu. Angerlarsimaffimmi ineeqqami mattusimalluni illumi najugaqartunut allanut attaveqarnaveersaartoqarsinnaanngippat taava illumi najugaqartut allat aamma angerlarsimaannassapput.
Inatsisartuni ilaasortanut atatillugu Aningaasaqarnermut Akileraartarnermullu atatsimiititaliami ilaasortat kisimik angerlarsimaannaqquneqarput.
Aasianni inuit qulit angerlarsimaannaqquneqartut Henrik L. Hansenip nassuiaatigaa.
Tunillatsissimasup angerlarsimaannarnissamut malittarisassanik malinnissimannginneranut atatillugu akiliisitsisoqassanersoq kinguneqartitsisoqassanersorluunniit politimesterip isumagisussaagaa, Kim Kielsen oqarpoq.
