Tunillatsissimasoqartoq: Inuit pingasut coronavirusimik tunillatsissimasut

Inuit pingasut coronavirusimik tunillatsissimapput.

Nunatta Nakorsaaneqarfiata nittartagaani tamanna takuneqarsinnaavoq.

Nunatsinni inuit 44-t coronavirusimik maanna tunillatseqqapput. Ippassaq 41-pput.

Tunillatsissimasutut sapaatiummat nalunaarsorneqartut marluk Kommune Qeqertalimmiipput. Kommune Qeqertalimmi inuit 13-it maanna tunillatseqqapput. Pingajuat Kommuneqarfik Sermersuumiippoq.

Nunatta Nakorsaaneqarfianeersumik kisitsisinut itisiliititsiniarluni apersuinissaq KNR-ip ualeq manna sulissutigaa, sulili iluatsinnagu.

Taamaammat tunillatsissimasut sumeeerpiarnersut suli paasissutissiissutigisinnaanngilarput.

Maanna tunillatseqqasut nunatsinni siullerpaamik 2020-mi tunillatsissimasoqaqqaarmalli aatsaat taama amerlatigaat.

Cornavirusip siammatsaalinissaa pillugu killilersuutit nutaat arfininngormat atuutilerput.

Tassalu inuit 20-nit amerlaneroqqusaannginnerat tamanillu ornigarneqarsinnasuni qanermut assiaquteqaqqusineq atorunnaarput.

Taakkununngali taarsiullugit tamanit ornigarneqarsinnaasut amerlanerpaani tamakkiisumik akiuussuserneqarsimassaatit, imaluunniit tunillatsissimannginnermut uppernarsaammik sivisunerpaamik akunnernik 48-nik pisoqaassusilimmik takutitsisinnaasariaqarlutit.

Malittarisassat aggustip ulluisa qulingata tungaanut atuukkallassapput.

Aasianni, Upernavimmi Upernaviullu qanittuani nunaqarfinni inuit 20-nit amerlanerusut suli katersuuteqqusaanngillat tamanillu ornigarfigineqarsinnaasuni kikkut tamarmik qanermut suli assiaquteqassapput.

Tamanna aqunneqarsinnaanngitsumik tuniluuttoqarneranik pissuteqarpoq.