Tuluit Nunaata nunatsinni sinniisoqarfeqalernissani isumaliutersuutigigaa

Tuluit Danmarkimi aallartitaata Tuluit Nunaata Kalaallit Nunaanni sinniisoqarfimmik ammaanissaq ‘maanna oqallisigigaat’, Future Greenlandimi ataatsimeersuarnermi oqaatigaa. 

Canadamit, Frankrigimit, USA-mit Tuluit Nunaanniillu aallartitat sisamat pingasunngornermi ualikkut oqallittarfimmiinneranni tamanna saqqummiunneqarpoq.

Oqallinnermi aqutsisup, Jens Henrichip Tuluit Nunaata nunatsinni sinniisoqarfeqalernissaa qanoq pingaaruteqartiginersoq apeqqutigaa.

- Tamanna oqaloqatigiissutigaarput, tassami ajunngitsumik iliuusererusutat piviusunngortinneqarnissaannut maaniinnissarput pingaaruteqarsinnaasoq tamannalu tamatta kissaatigigipput isumaqarpunga, Victoria Billing oqarpoq.

Ataatsimut isigalugu aallartitap Tuluit Nunaata Kalaallit Nunaanni najuunnerorusunnera erseqqissaatigaa:

- Inuit tulunnit peqataasoqarnerulernera aamma Tuluit Nunaata Københavnimi aallartitaanit tikeraartoqarnera takusinnaagaat neriuutigaara, Londonimilu suleqatikka marluk ullumikkut aamma ilagaakka. Taamaammat peqataanerput pitsanngorsarusulluinnarparput, Victoria Billing oqarpoq, nangillunilu:

- Kisianni (sinniisoqarfimmik aaqq.) pilersitsinissaq oqallisigisatta ilagaat, tassa suleqatigiinnitta siunissaa innutaasunut iluaqutaasumik pitsaanerpaamik qanoq pitsanngorsarneqarsinnaanersoq. 

Aallartitap tamanna ilutigalugu Sulisitsisut pisortaat, Christian Keldsen – suliaqarujussuarneranut qujassuteqarfigaa.

Issittoq sanilerisani qaninnerpaasoq

Victoria Billingip Kalaallit Nunaata Tuluit Nunaannut qanoq pingaaruteqarnera aamma isertuutinngilaa.

- Issittup qaninnerpaamik sanilerisaatut imminut isigivugut. Imaani killeqarfigut avitseqatigiissutigaagut. Niueqatigiinnermi suleqatini pingaaruteqartuuvugut, Victoria Billing oqarpoq.

Taanna Danmarkimi aallartitatut atuuffimmi aallarteqqammerpoq.

- Københavnimut sapaatit akunneri sisamat matuma siorna tikippunga, qaammatip ataatsip siulliup iluani maaniinnera Tuluit Nunaata Kalaallit Nunaatalu akornanni suleqatigiinnerup uagutsinnut qanoq pingaaruteqartigineranik takutitsisoq neriuutigaara, Victoria Billing oqarpoq.

Tuluit Nunaata suleqatigiinnermi sillimaniarneq, aalisarneq, silap pissusia aatsitassallu pingaartikkai, aallartitap oqaatigaa.

Taassumalu Tuluit Nunaata ministeriunerata, Keir Starmerip aamma Jens-Frederik Nielsenip (D) killilersugaanngitsumik niuernermut isumaqatigiissutit naammassinissaat pingaartikkaat oqaatigaa.

- Kalaallit aalisagaataannik tuluit niuertarfinniittoqalernissaannut iluaqutaalluinnartussaq maanna naammassissavarput, Victoria Billing oqarpoq.

Ikinngutit tatigineqartut

Tuluit inatsisartui sisamat Nuummut februaarimi aamma tikeraarput.

 Taakku kalaallinut innuttaasunut Donald Trumpip nuamik tiguaaniarluni siorasaaruteqarnerata nalaani ersoqatigiinnermik tunissuteqariartorlutik tikeraarput.

Skotlandimit inatsisartunut ilaasortap, Brendan O’Harap Tuluit Nunaannit tapersiineq Kalaallit Nunaannut atatillugu qanorluunniit pisoqaraluarpat atuutissasoq tassunga atatillugu erseqqissaatigaa.

- Nunarsuarmi tapersersorneqarassi ilisimassavarsi. Tapersersuineq tamanna tammarnavianngilaq, taanna KNR-imit apersorneqarami oqarpoq.

Victoria Billingip Tuluit Nunaat puljemik 700 millionit koruuninik aningaasartaqartumik, Kalaallit Nunaata qinnuteqarfigisinnaasaanik peqarlutik, Future Greenlandimi aamma oqaatigaa.

- Ilisimatusarnermut pilersaarutit kalaallit suliaqarfiinit qinnuteqarfigineqarnissamut ammasut ikittuinnaapput, Victoria Billing oqarpoq.