Tuberkulosemut akiuussutissaq ilisimagisamit pitsaanerusoq

Tuberkulosemut akiuussutissaq tunillatsinnginnissamut nappaatigineqarneranullu illersuutaasinnaasoq, Tasiilami misissuisoqarnerani tamanna paasineqarpoq.
septembarip 25-at 2014 11:35

Tasiilami eqqaanilu meeqqat inuusuttullu arfinilinnit 30-it tungaannut ukiullit 950-it aaversinnerisa takutippaat, taakku 29 procentii 2012-imi tuberkulosemik tunillatsissimasut. Tuberkulosemullu akiuussutissamik kapitissimasut sisamaagaangata ataaseq tunillatsissimasarpoq, affaasalu missaat tuberkulosemut akiuussutissamik kapitissimanngitsut tunillanneqarsimallutik.

 

Tamannalu tupaallannartuusoq, Statens Serum Institutimi nakorsap ilisimatusartullu Sasche Wilk Michelsenip oqaatigaa. Isumaqartoqarpormi akiuussutissaq nappaammut tuberkulosemut taamaallaat iluaqutaasinnaasoq, tunillatsinnissamullu iluaqutaanani. Grønlandsmedicinsk Selskab taama paasissutissiivoq.

 

- Misissuinerit ilaasa takutippaat, akiuussutissaq pineqartoq tunillatsinnissamut ilaqutaasoq, tamannali ilumoornersoq assortuussutigineqartupilussuuvoq. Iluaqutaaneranillu isumaqartoqarnera ilumoorpasippoq.

 

Inersimasut tunillatsittartut amerlanerusut

Tuberkulosemut ataasiinnarmik akiuussutissaqarpoq, tassalu BCG - Kalaallit Nunaannilu meeqqat tamaasa meeqqanik akiuussutissamik tunineqartarnerinut atatillugu taassuminnga neqeroorfigineqartarput. Piffissamili 1991-imit 1996-imut akiuussutissaq taanna neqeroorutigineqanngilaq, tuberkulosemik tunillatsissinnaaneq annikitsuararsuusoq taamani nalilerneqarmat. 

 

Tamannali kalaallinut inersimasunut ullumikkut tunillatsissimasunut maanna kingunerlutsitsivoq.

 

Taamaammat akiuussutissap sunniutaata misissuiffigineqarnera pingaaruteqarpoq, Sascha Wilk Michelsen oqarpoq nangillunilu:

 

- Taamaammat Kalaallit Nunaanni iluaqutaanera oqaatigissallugu pingaaruteqarpoq. Meeqqat akiuussutissamik tunineqartarneranni BCG ilaareerpoq, tamannalu pitsaalluinnarpoq. Tuberkulosellu nappaatigineqarneranut tunillatsinnginnissamullu iluaqutaanera pillugu paasissutissaqalernera sapinngisamik amerlanerpaat akiuussutissamik kapitittalernerinik kinguneqarnissaa neriuutiginarpoq.