Qujaukitsoq: Eqqugaasimasunut taarsiissutit akileraarutitaqassanngillat
Nuugaatsiami Illorsuarnilu innuttaasut siorna 50.000 koruuninik taarsiiffigineqartut taartisiaminnit akileraaruteqannginnissaannik siunnersuut Inatsisartuni sisamanngormat oqaluuserineqarpoq.
Tamannalu Siumup politikkikkut oqaaseqartartuata nuannaarutigaa.
- Inuit taakkunani najugaqartut misigissutsikkut annertuumik eqqugaareernermi qaavisigut inuiaqatigiittut naliginnaasumik ingerlaqataaneranni immikkut isigineqalaarsinnaanerat taanna inissaminiippoq.
- Tamatsinnut sunniuteqarnikooqaaq, kisianni inunnut pineqartunut suli sakkortunerusumik eqquisimanerata malitsigisaanik oqinnerusumik inuiaqatigiinni akuulernissaannut iluaqutaanissaa taanna anginerpaaq atuussinnaanissaanut qulakkeerumallugu, uagut akuersaarnikuuvugut, Karl Kristian Kruse KNR-imut taama oqarpoq.
Nittartagaq naapertorlugu, akileraarutit eqqarsaatigalugit pisussaaffilerneqanngitsumik taarsiissutit tunniussatut isigineqarput, taarsiissutivittullu isigineqarnatik.
Siunnersuummili atuarneqarsinnaavoq innuttaasut pineqartut taartisiatik akileraarutigissanngikkaat, Sermitsiaq.AG taama allaaserisaqarpoq.
AAMMA ATUARUK Qimagutitinneqartuni imigassaq aalakoornartortalik ajornartorsiutaalersimasoq
Siunnersuut aningaasaqarnermut naalakkersuisumit saqqummiunneqartoq novembarip aallaqqaataani aappassaaneerneqassaaq.
AAMMA ATUARUK Illorsuarni Nuugaatsiamilu atortut avatangiisinut ulorianaatillit salinneqalersut
