Qimagutitinneqartuni imigassaq aalakoornartortalik ajornartorsiutaalersimasoq
Illorsuarnit Nuugaatsiamillu qimagutitinneqartut Avannaata Kommunianit tarnip pissusaanik ilisimasalimmik oqaloqateqarnissaminnik arlaleriarlutik periarfissinneqarput.
Ilaannaannulli iluaqutaasimavoq. Qimagutitinneqarnerup kingorna inuunerilersimasaq ilaannut sakkortusoq ajornartorsiulertitsisorlu, Illorsuarneersoq Erik Møller oqarpoq:
- Siullermik, ukioq 2017-imi, tamatta imigassamut nakkaatingaatsiarnikuuvugut, kisiannili qaangiiartoqqilernikuulluta.
Sulimi inoqartoq pisumik qaangiisimanngitsunik, Uummannami palasi Ludvig Fleischer oqarpoq:
- Ulloq manna tikillugu ataasiakkaanik utersaartoqarsinnaasarpoq. Kisianni amerlanerpaat malugisinnaavakka ingerlariaqqinnissaminnik piumassuseqartut, Ludvig Fleischer oqarpoq.
Illorsuarni Nuugaatsiamilu nunaqarfinni aqutsisuni siulittaasup Karl Peter Møllerip imigassamik ajornartorsiuteqartoqarnera aamma eqqaavaa:
- Tupinnanngitsumik tamakku ullumikkut atugarineqalerput.
Imigassamilli aalakoornartortalimmik atornerluisumik toqqaannartumik naammattuuisimanatik, kommunimi isumaginninnermut Uummannami immikkoortortaqarfiani pisortaagallartoq oqarpoq.
Qimagutitinneqarsimasulli utersaartoortarnerat imigassamilluunniit atornerluinerat kommunimit maluginiarneraat aperigatsinni, pisortaagallartoq ima akivoq:
- Ajornartorsioraangamik soorunami saaffiginnittarput. Taava aamma qanittukkut naammassisumik katsorsaasoqarnikuuvoq, tassa ingerlaqqikkusuttut imigassamillu nakkarsimallutik misigisimasut tassani ilaapput, Uummannami isumaginninnermut immikkoortortaqarfimmi pisortaagallartoq Kristine Samuelsen oqarpoq.
Tarnip pissusaanik ilisimasallit katsorsaasullu tallimat Avannaata Kommunianeersut qimagutitinneqartunik ajunaarnersuup ukioq ataasinngortorsiornerani Uummannamut oqaloqatiginnikkiartorput.
