Illorsuarni Nuugaatsiamilu atortut avatangiisinut ulorianaatillit salinneqalersut
Karrat Kangerluanni juunip 17-iani tassaarsuaqarnerata kingorna avatangiisini suliniutissat saliinissallu suut maannakkorpiaq salliutinneqartariaqarnersut Upalungaarsimanermut Aqutsisoqarfik Namminersorlutik Oqartussanit qinnuigineqarluni naliliivoq.
Suliassallu arfininngornermi aggustip tallimaanit qulingiluaanut ingerlanneqarsinnaanissaat naatsorsuutigineqarpoq.
Qaasuitsup Kommunia Upalungaarsimanermut Aqutsisoqarfimmit tapersersorneqarluni nunaqarfinni suliassanik aqutsissaaq, kiisalu Issittumi Sakkutooqarfik suliat ingerlanneqarnerini isumannaallisaanermut akisussaasuussalluni.
AAMMA ATUARUK Karrat kangerluani malik siuleqanngitsumik portusoq
Illorsuarni Nuugaatsiamilu atortut avatangiisinut ulorianaatillit sapinngisamik salinneqarnissaat illullu qajannaarneqarnissaat anguniagaavoq. Tamatumani inuit avatangiisillu isumannaatsuunissaat eqqarsaatigineqarpoq, nunaqarfiit ulluinnarni nakkutigineqanngimmata.
Tamatuma saniatigut imaani avatangiisit eqqarsaatigalugit ikummatissaasivik, siusinnerusukkut Nuugaatsiap avannaani sumiissusersineqartoq qaqinniarneqassaaq.
AAMMA ATUARUK Najugaqartut uteqqinnginnissaat sakkortuumik inassutigineqarpoq
Saliinermi avatangiisinillu isumannaallisaanermi Nukissiorfinni, TELE Greenlandimi, KNI-mi, Royal Greenlandimi, Polar Oilimi aamma Halibut Greenlandimi sulisut nunaqarfinni pineqartuni marluusuni atortuminnik isumannaallisaanissamut aamma periarfissaqassapput.
Sumiiffimmi qaqqamit nutaanik sisoortoqarluni tassaarsuaqaqqissinnaanera suli ulorianaateqarmat, oqartussaasut juulip ulluisa sisamaanni naliliipput, Illorsuit aamma Nuugaatsiaq suli ulorianartorsiorfittut isigineqartariaqartut. Taamaattumillu innuttaasut Nuugaatsiamut Illorsuarnullu utertariaqanngitsut, inuillu sumiiffimmiinnginnissaat inassutigineqarpoq.
