Tassaarsuaq Najugaqartut uteqqinnginnissaat sakkortuumik inassutigineqarpoq

Nuugaatsiami Illorsuarnilu aarlerinartoqarpallaaqaaq. Taamaammat Qaasuitsup Kommunia Naalakkersuisullu taakkunani najugaqartut uteqqinnginnissaannik sakkortunerpaamik inassuteqarput.

Allattoq Sara K. Jakobsen, Anton Gundersen Lihn

juulip 17-at 2017 07:41

- Illut ulorianartumiittut najugaqarfigineqaqqinnissaat uagut innersuussutiginngilarput; Naalakkersuisut innersuussutiginngilaat aamma upalungaarsimanermut ataatsimiititaliarsuup innersuussutiginngilaa, Qaasuitsup Kommuniani borgmesteri, Ole Dorph, taama oqarpoq.

Upalungaarsimanermut ataatsimiititaliaq, ilaatigut politiinik, Issittumi Sakkutooqarfimmiit, peqqinnissaqarfimmiit Namminersorlutillu Oqartussaniit ilaasortaqartoq, GEUS Asiarlu suleqatigalugit Illorsuit Nuugaatsiarlu qanoq aarlerinartorsiortiginerannik misissuisimavoq.

AAMMA ATUARUK Oprydning fjerner farer i flodbølgeramte bygder

Misissuinermilu paasinarsivoq tamaani qaqqat suli nakkaattoorsinnaasut. Tassaarsuaqaqqissagaluarpallu Illorsuarni illut 18-it imaanut ammussaasinnaasut ilimagineqarpoq, Nuugaatsiallu annersaa eqqugaasinnaalluni.

Upalungaarsimanermut ataatsimiititaliap naliliinera

Tassaarsuaqaqqissagaluarpallu tamanna sukkasoorujussuarmik pisinnaavoq innuttaasullu sukkasuumik kalerrinneqarsinnaanngillat.

AAMMA ATUARUK Qaqqap qaartinneqarnissaa isumassarsiatsialaanngitsoq

- Tamakku pissutsit aallaavigalugit upalungaarsimanermut ataatsimiititaliarsuaq Naalakkersuisunut inassuteqarpoq, pissutsit taamaakkallartillugit Nuugaatsiap Illorsuillu innuttaasa uteqqinnissaat innersuussutigisinnaanagu, Ole Dorph taama oqarpoq, erseqqissaatigalugulu kommunalbestyrelsi tamakkiisoq nunaqarfinnut uteqqusinnginnermik inassuteqartuusoq.

Kommunilu qimagutitinneqarsimasut sumiikkusunnerannik maanna tusarniaavoq.

AAMMA ATUARUK Qaqqaq alla sisooriaannaavoq

- Taakkua ukiuni aggersuni sumi najugaqarallarnissaat pisinnaassasoq. Aamma taakkua kissaataat tusarniarneqarpoq siunissami ungasinnerusumi, nunaqarfinnut uternissap qaqugu pinissaa nalugallartillugu, sumi najugaqalersinnaanerat pilersaarusiornissaa, Ole Dorph taama oqarpoq.

Tassalu pisortat nunaqarfinni illuutaat nappartinneqassanngillat. Nunaqarfiimmi suli aarlerinartorsiorfiuallaartut, borgmesteri oqarpoq.

AAMMA ATUARUK Qaqqap sisooortup eqqaani sisoortoqallattaasoq

Tassaarsuaqaqqissinnaanera aarleqqutigineqarmat aturfeqarnanilu assigisaanik peqarnavianngitsoq, Ole Dorphip oqaatigaa.

- Toqqavikut atorlugit illunik nappaatiteqqissagaluarutta, tulliani nakkaattoqarpat, aamma tamaqqinnaasa ammutissuai, Qaasuitsup Kommuniani borgmesteri, Ole Dorph, taama oqarpoq.

Nuugaatsiaq Illorsuillu juunip ulluisa 17-ianni tassaarsuaqarnerani qanoq eqqorneqartiginersut pillugu kisitsisit, assit ataaniittut takutippaat. Illut sorliit, nunaqarfiillu immikkuualuttortai sorliit tassaarsuaqaqqinnerani eqqorneqariaannaanersut kisitsisit takutippaattaaq.