GEUS: Qaqqap sisooortup eqqaani sisoortoqallattaasoq

Sisoorfiup eqqaa tamarmi sisoorfiullattaasoq, GEUS ilisimatitsivoq.

- Eqqaa tamarmi takussutissaqarpoq sumiiffiit ilaanni kaanngartoqartarsimasoq sisoortoqartarsimalluniluunniit. Takusinnaavarput sisoorfiusup kangiani annikinnerusumik 2009-p 2015-illu akornanni sisoortoqarsimasoq, GEUS-imi ujarassiooq Stefan Bernstein oqarpoq.

Bernstein naapertorlugu qaqqat sisoortarneri nalinginnaasuupput, tassami kiatittarnerata nillertittarneratalu piffissap ingerlanerani qaarsoq aseroriartortarmagu.

Assit nutaat ilisimatuut iluaqutigisinnaagaat

Taamaammat sisoortoqaqqinnissaa qularnanngilaq, tamannali qaqugu sumilu pissanersoq, Bernsteinip erseqqissumik oqaatigisinnanngilaa.
- Soorunami nunaqarfinnut sisoorfiusinnaasut eqqaaniittunut soqutiginaateqarpoq, tamannalu ilisimasalinnit nakkutigineqarluarsinnaavoq.

GEUS-ip assilisarpassui ukiut kingulliit marluk katersai ilisimasalinnut taamatullu nunaqarfinni eqqugaasuni innuttaasunut iluaqutaassasut, ujarassiuup oqaatigaa.

- Uummannap Upernaviullu kangerluinit assilisat erseqqarissut 35.000-it sinnerpai, Stefan Bernstein oqarpoq.

Assilisat nunap pitsaanerusumik assiliornissaanut atugassiaapput, Bernsteinili naapertorlugu ujarassiornermi aamma atorneqarsinnaapput.

Qullisani tassaarsuaq

Qaqqallu sisoortarneri annertunerusut nunatsinni takornartaanngitsut, Bernsteinip ilanngullugu oqaatugaa. Ukioq 2000-imi Nuussuup qeqertaasaata kujasissuani qaqqamik annertuumik sisoortoqarpoq. 
- Qaqqaq taanna aamma sivingasuuvoq, sisoornerlu annertuumik imaanut nakkaatitsivoq tassaarsuartitsillunilu.

Tassaarsuaq nakkaaffiup kangianiittumut Saqqamut ingerlaarpoq, angallatillu arlallit aseruatiterlugit. 

Qullissat tassaarsuarmit immamit meterinik 30-nik portussusilimmit ukioq 2000-imi eqqugaavoq.

- Illut sissamiittut saavigussaapput, Stefan Bernstein oqarpoq.

1952-imi qaqqap sisoornerata kingunerisaanik Qullissat tassaarsuarmik aamma eqqugaavoq. Inuk ataaseq ajunaarpoq.