Tusagassiuut: Trumpip nunarput pillugu ilungersuussineranut tunuliaqutaasut kikkuunerinut paasissutissat nutaat

Donald Trumpip Kalaallit Nunaanni anguniagaanik ukiup aappaa avillugu suliniuteqartut Amerikamiut atuagassiaataanni The New Yorkerimi allaaserisami nutaami allaaserineqarput.

 Danmarks Radiomit  The New York Timesimiillu paasissutissat siornatigut saqqummiunneqareersut uppernarsarneqarnerisa saniatigut, Amerikamiut Trumpip præsidentitut atorfeqaqqaarneraniilli qanillattorniarsarinerat pillugu oqaluttuaq,  allaaserisami sukumiinerusumik sammineqarpoq.

Præsidentip illorsuani eqimattaq isertuussaq

The New Yorkerip allaaserinninnera naapertorlugu, angutit taakkua marluk, nunatsinni ukioq kingulleq sunniiniarsarisimaneragaasutut unnerluussaaqqasut, præsidentip illorsuani Trumpip præsidentiuffiata siulliup nalaani, illersornissamut siunnersuisoqatigiit ataanni suleqatigiissitani eqimattanngortitami isertuussami peqataasimapput. 

Angutit taakkua ateqarput Tom Dans aamma Drew horn, atuagassiamilu allaaserisaq naapertorlugu, taakkua eqimattamut Amerikamiut Kalaallit Nunaannik tiguaanissaannik qularnaatsumik siunertaqartumut ilaapput. 

Tom Dans aamma Drew Hornip Amerikamiut naalakkersuisuini suleqatigiissitaliami  The Greenland Policy Coordination Committeetut ilisimaneqartumi immikkut suliffeqarfitik inuit allat peqatigalugit sinniisuuffigaat, tusagassiortoq allaaserinnittoq Ben Taub allappoq.  

The New Yorkerip allaaserinninnera naapertorlugu, eqimattap Naalagaaffeqatigiinnerup ajortisarniarnissaa suliniutigaa.

Niertoq Drew Horn eqimattami aqutsisut ilagaat.

Danmark Kalaallit Nunaallu tamanna pillugu ilisimasaqanngitsut 

Eqimattamut peqataasut Kalaallit Nunaanni aatsitassat eqqartorniarlugit Nuuk 2019-imi ukiakkut tikeraarpaat, atuagassiaq allassimavoq.

Amerikamiut aallartitaannut peqataapput. 

Tikeraalli isertorlutik siunertaat Kalaallit Nunaanni tikilluaqqusisunit ilisimaneqanngilaq.

Tom Dans aamma Drew Horn politikerinut, niuertunut innuttaasunullumi aamma attaveqalerniarsaralutik Kalaallit Nunaannut Trumpip præsidentinngoqqimmalli utikapput. 

Tamanna kalaallit, danskit nunallu tamalaat tusagassiuutaanni allaaserineqarpoq.

Danmarkip Kalaallit Nunaataluunniit eqimattaq taanna, eqimattap siunertaa Tom Dansip Drew Hornillu eqimattami qanoq inissisimanerat, Amerikamiut atuagassiaata allaaserinninnera naapertorlugu, ilisimasaqarfiginngilaat.  

Angutit taakkua marluk Kalaallit Nunaanni suliaqartarnertik pillugu Kunngeqarfimmit piffissami sivisuumi alapernaaffigineqartarput, The New Yorkerip The New York Timesillu tusarfii oqaluttuarput, politikerilli tungaannit ilitut nalinginnaasutut, naalagaaffiit akornanni attaveqatigiinnermi qangaaniilli periutsit atorlugit pissusilersortutut pineqarpasiinnarput, Kalaallit Nunaanni politikkikkut aalassatsitsiniaasutut isigineqarnatik:

The New Yorkerip allaaserinninnera naapertorlugu, Kalaallit Nunaata Washingtonimi aallartitaqarfiata Tom Dans Trumpimik illersuisumut Jørgen Boassenimut attaviginninniarnerani ikiorpaa. 

Naleqqamilu siulittaasup, Pele Brobergip, Drew Horn arlaleriarluni nereqatigereeraa, atuagassiaq aamma Reuters allapput.

Aamma danskit Washingtonimi aallartitaqarfiata Tom Dans, Drew Horn aamma Alexander Gray - Trumpip naalakkersuinerata nalaanni Kalaallit Nunaannut tunngatillugu pilersaarutinut isertuussanut peqataasut pingajuat - nereqatigiissitsinernut katerisimaartitsinernullu allanut qaaqqunikuuai.

Angutit taakkua pingasut tamanna danskit tusagassiuutaannut Frihedsbrevetimut uppernarsarpaat. 

Motorcykelertartoq

New Yorkerimi allaaserisami allaaserineqartut pingajuat tassaavoq Chris Cox, motorcykeleqatigiittartunik Bikers for Trump-imik pilersitsisoq, tusagassiuutinitarlalinnit allanit aamma allaaserineqartoq. 

Chris Coxip Nuuk ukioq kingulleq tikeraarpaa, tusagassiuutillu arlallit nutaarsiassiinerat naapertorlugu, taassuma innuttaasut namminersulivinnissamut suliniuteqartunut ilanngunniarsarai innuttaasullu politikkikkut isummersuutai allattorsimaffimmut nalunaarsorlugit kiisalu Kunngeqarfimmi avissaartuutsitsiniarnissaminut Kalaallit Nunaata oqaluttuarisaanera pillugu paasissutissanik katersilluni.

The New Yorkerip nutaarsiassiinera naapertorlugu Chris Coxip præsidentip illorsua republikanerillu kongressimi ilaasortaatitai angalaneq pillugu tamatuma kingorna ilisimatippai.

Drew Horn Trumpip naalakkersuisoqarfiani ilaasortanut Kalaallit Nunaanneereeraangami aamma assinganik iliuuseqartarsimanera atuagassiamit allaaserineqarpoq,Tom Dansillu præsidentip illorsuanut attaveqarluarninitusagassiuutinut arlalinnut aamma erseqqissaatigereerpaa. 

Tom Dans Trumpip atuunnerata nalaani USA-p issittumi ilisimatusarnermut ataatsimiititaliarsuani siuttuusussanngortinneqarpoq, Chris Coxillu Nuummut angalaneranit qaammatit pingasut qaangiuttut Department of Homeland Securitymi, USA-p nunami imminermut politikikkut ministereqarfiani siunnersuinermi ataatsimiititaliaani ilaasortanngorluni.

Kalaaleq malinnaasoq

Angutit sisamaat kingullerlu tassaavoq Jørgen Boassen, ilanngutassiami allaaserisaq naapertorlugu taanna 'kalaallit Trumpimut ammasumik tapersersuisut ikittut ilagaat'.

Boassenip - Jeff Landryp tikeraarneranitulli - Danip aamma Coxip Kalaallit Nunaannut atatillugu suliaqarneranut aamma ikiuuttoq, The New Yorker allappoq.

Allaaserisami takisuumi oqaluttuarineqartutut taanna najukkami malunnaateqartumik attaveqaataavoq; tassa Boassen Amerikamiut suliniuteqartut aamma Kalaallit Nunaata ilaata akornanni pisortatigoortuunngitsumik attaveqaataalluni.

Ataatsimut isigalugu Kalaallit Nunaat pillugu aaqqiagiinngissuteqarnermi suliaqartut nalinginnaanngitsut ersarinnerusumik takutinneqarput.

Ben Taubip 'Trumpip Kalaallit Nunaannik aqutsilerusunnera anguniagassanik ilulersuisunik ajornannginnersiortunillu aallaaveqartuaannartoq' allappaa.'

Aamma 'USA-mi sorsunneq eqqissinerlu pillugit aalajangiinerit naalagaaffimmit piginnaaneqartitaalluni aallartitaanermik suliaqartunit imaluunniit sakkutooqarneq pillugu immikkut ilisimasaqartunit naalagaaffiup soqutigisai aallaavigalugit aalajangiiffigineqarneq ajortut, taakkulu inuit, præsidentimut - ilaqutariinni attaveqaatit, niuernerit, aningaasatigut tapiissuteqarnerit, nersuinerillu aqqutigalugit qaninnerpaamik inissisimasut, pisortatigoortuunngitsut aqqutigalugit aalajangerneqartarlutik'.