Tusagassiuut: Angutit pingasut nunatsinni ‘sunniiniarlutik isertortumik suliaqarnerarneqartut’ aaku
Danmarks Radiop oqaluttuaq nunarsuarmi inuiaqatigiinnut uissuummissutaasoq siorna aggustip naanerani saqqummiuppaa.
DR-ip tusarfii, ilaatigut PET-imeersunik ilaqartut oqarnerat naapertorlugu Amerikamiut angutit pingasut præsident Trumpimut attaveqartut Naalagaaffeqatigiinni avissaartuuttoqarnissaanut Kalaallit Nunaatalu namminiilivinnissaanut tapersersuisoqartitsilerniarlutik sunniiniarnermik iliuuseqarput.
Angutit ilaat kalaallinik Trumpip qeqertamik USA-mut ilanngutititsiniarluni pilersaarutaanut tapersersuisunik – kiisalu suliniummut akerliusunik allattorsimaffiliornerarneqartoq, DR-ip oqaatigaa.
DR-ip tusarfimminik, ilaatigut PET-imeersumik, angutinik pingasunik Kalaallit Nunaannit sunniiniarsarisoqarneraasunik illersuiniarnera eqqarsaatigalugu, angutit atilerlugit saqqummiunneqanngillat.
Danmarkimi nunanut allanut ministereqarfiup saqqummiussaq pissutigalugu USA-p aallartitaani qullersaq ataatsimiigiaqquneqarpoq, Lars Løkke Rasmussenillu (M) avissaartuutsitsiniarsarineq kunngeqarfiulluunniit susassaqarfiinut akuliunniarsarineq akuerineqarsinnaannginnerarlugu naqissuserpaa.
Trumpip anguniagaanik ammasumik siuarsaasoq
Angutit taakku pingasut, Danmarks Radiop nunatsinni sunniiniarsaralutik isertumik suliaqarneragai kikkuunersut The New York Timesimit sapaatip akunnerani matumani saqqummiunneqarput:
Angutit pineqartut siulliit tassaapput Thomas Dans aamma Drew Horn.
Niuertut taakku nunatsinnut Trumpip 2024-mi qinigaaqqinnerata kingorna arlaleriarlutik angalapput, kalaallillu innuttaasuinut pissaaneqarniartunullu ilungersorlutik attaveqalerniarsaripput.
Angutit pingajuat tassaavoq motorcykelertartunik Bikers for Trumpimik pilersitsisoq, Chris Cox taanna siorna marsimi Nuummiippoq.
Angutit pingasut Trumpip allaffeqarfianut qanimut attaveqartutut ilisimaneqarlutillu suliniutinut Kalaallit Nunaannut attuumassutilinnut inuttut nammineq pisortatigoortumillu akuusimapput.
Angutit pingasut suliaqarnerat maluginngitsoorneqarsimanngilaq, taakkulu Amerikamiut Kalaallit Nunaannut tunngatillugu soqutigisaannik siuarsaaniarnertik isertuussimanngikkaat, The New York Times allappoq.
Aqqit Thomas Dans aamma Drew Horn ilisimaneqarluarput, aamma taakku kalaallit, danskit nunanilu tamalaani tusagassiorfinnit allaaserineqangaatsiarsimapput.
Angutit taakku nunanut allanut politikki inuussutissarsiornermilu suliniutit akuleriissillugit eqqartorpaat, taama periuseqarneq Trumpip allaffeqarfianit iliuuserineqartoq ukiuni kingullerni ilisimaneqarlualerpoq, The New York Times allappoq.
Aviisip Dans aamma Horn oqaloqatigai Chris Coxili oqaloqatiginagu.
Angutit marluk isertortumik suliaqarsimannginnerarlutillu arlaatigut peqqusersuusersorsimannginnerarput.
Taakku DR-ip saqqummiussaa imminnut tunngasimassagunarluinnartoq nassuerutigaat, suliamullu ilisimasaqartup danskit isertortumik paasiniaasartuisa angutit taakku marluk alapernaalluinnaraat aviisimut oqaatigaa.
Inuussutissarsiuteqartoq aamma Trumpimut tapersersuisoq
Drew Horn inuussutissarsiuteqartuuvoq, taannalu Trumpip allaffeqarfiani siullermi sulisimalluni.
Taassuma suliffeqarfik GreenMet, aatsitassanik pingaarutilinnik aamma paasissutissaasivimmik ilaatigut Kangerlussuarmiittussamik, isornartorsiorneqarluni qisuariarfigineqartumik, suliaqartoq ullumikkut ingerlataraa.
Thomas Dans USA-p aningaasaqarnermut ministereqarfiani atorfiliusimallunilu Trumpip allaffeqarfiani siullermi USA-p issittoq pillugu ataatsimiititaliaani ilaasortaasimavoq.
Taanna USA-p issittumi ilisimatusarnermi ataatsimiititaliaani, præsidentimut Kongressimullu issittumi ilisimatusarnermi anguniakkat pillugit siunnersuisartumi siulittaasussatut siorna ukioq naalersoq toqqarneqarpoq.
Taanna atuuffimmut tassunga toqqarneqannginnermini USA-p Kalaallit Nunaatalu akornanni qaninnerusumik attaveqaateqalernissamik siuarsaaniartumi Jørgen Boassen peqatigalugu ingerlatamini pisortaavoq.
Thomas Dans Donald Trump Jr.-ip Nuummut 2025-mi januaarimi tikeraarnisaanik aaqqissuussisuullunilu Jørgen Boassenimik aamma Kuno Fenckerimik præsidentitut ivertitsisoqarnerani Washingtonimi nalliuttorsiornermut ilaatigut peqataatitsivoq.
Taassuma præsidentip tullersortaata, J.D. Vancep aamma præsidentip tullersortaata nuliata Usha Vancep Nuummut tikeraarniarnerat aamma qimussersuartoqarnerani peqataaniarnerat aamma aaqqissuuppai, angalanissaalli taamaatinneqarluni Pituffik Space Basemut tikeraapallalaaginnarnissamut allanngortinneqarpoq.
Motorcykelertartoq Chris Cox danskit isertortumik paasiniaasartuinit qanimut malinnaavigineqartoq tusarfiup aviisip oqaloqatigisaata aamma oqaatigaa.
Taanna tv-kkut isiginnaagassiami 60 Minutesimi Nuummiinnermini peqataavoq, innuttaasunut attaveqarniarsaraluni.
Taanna Donald Trumpip aamma USA-mi Homeland Securitymi ministeriusup, Kristi Noemip ministereqarfimmi siunnersuisoqatigiinnut juunimi toqqarpaat.
Præsidentip illorsua angutit taakku pingasut pillugit aperineqarami taakku imminnut atassutaat suliaallu pillugit oqaaseqarumanngilaq.
Taarsiullugulu Trumpip allattoqarfiata Kalaallit Nunaat NATO-lu isumaqatigiissusiortut tamannalu 'USA-mut pitsaalluinnartuussasoq', Præsidentip Illorsuata nalunaarutigaa.
