Trump Pituffimmiinnerminnut akiliuteqartitserusuttoq
Nunat Amerikamiunit sakkutooqarfigineqartut sakkutooqarfiit ingerlanneqarneri akilertalissavaat, Amerikamiullu sakkutuuisa nunaminniinnerinut qaavatigut 50 procentinik akiliuteqartalissallutik.
Trumpip naalakkersuisuineersut taama isumaqarput, pilersaarutertillu cost+50-imik taaguuteqartippaat.
Trumpip akiliuteqartalernissamik siunnersuutaanut ilaasut ilaat tassaavoq Pituffik.
AAMMA ATUARUK Pituffik pillugu aaqqiissuteqarallartoqassanngitsoq
Naalagaaffeqatigiilli Thule Air Basemut akiliisalernissaminnut tatineqarsinnaanerat piviusorsiortuunngitsoq, Illersornissamut ilisimatusarfiup Pilersaarusiornermut misissuisoqarfiani Ph.d-iullunilu lektoriusoq, Peter Viggo Jakobsen, Danmarkip Radioata aallakaatitassiaani P1 Morgenimi taama oqarpoq.
Amerikamiummi Pituffimmi sakkutooqarfik namminneq atorpaat iluaqutigalugulu, lektori oqarpoq.
- Amerikamiut nunap sakkutooqarfigisamik sunut tamanut akiliuteqarnissaanik qaavatigullu 50 procentinik akiliuteqaqqinnissaanik piumasaqariataarsinnaanerat matumani takorlooruminaatsippara. Pituffimmilu sakkutooqarfimmut tunngatillugu akiliuteqartalernissamut akuersinissarput aamma takujuminaatsittupilussuuara, lektori oqarpoq.
AAMMA ATUARUK Pituffik russinut isumannaallisaataavoq
USA-p Pituffimmi sakkutooqarfeqarnerminut akiliuteqaqqusinissaata ilimanannginnera Illersornissamut ilisimatusarfiup Sakkutooqarnikkut Suliniutinut misissuisoqarfiani lektorip Jon Rahbek Clemmensenip isumaqatigaa. Tamanna ilaatigut sakkutooqarfiup nunatsinnut illersuutaanani saassunneqarsinnaaneranik annerulersitsineranik pissuteqarpoq.
Aamma Pituffimmi kiffartuussinissamik isumaqatigiissutip nunatsinnit 2014-imi annaaneqarneranik suliaq sivisooq pissutigalugu, nunatta Danmarkillu akiliuteqarnissaannut USA-p tunngavilersuutissai pitsaanerpaajunngitsut, Jon Rahbek Clemmensenip P1 Morgenimut oqaatigaa.
- Kalaallimmi maanna misigisimapput Amerikamiunit pissaqartinneqarlutik. Tamannalu Amerikamiut taama piumasaateqassannginnerinut aamma pissutaavoq alla, periarfissagissaanngillammi, Jon Rahbek Clemmensen oqarpoq.
Akiliuteqartalernissarli nunanut assersuutigalugu russinut kinamiunulluunniit ernumassuteqartunut, imaluunniit Amerikamiut sakkutooqarfiliornissaannik namminneerlutik noqqaassuteqarsimasunut piviusunngortinneqarsinnaanera ilimanaateqarsinnaavoq.
- Nunat Amerikamiut sakkutuuisa najuunnissaannik ilungersuuteqartut akiliuteqaqqinnissamut piumassuseqarsinnaanissaat ilimanarsinnaavoq, lektori oqarpoq.
Peter Viggo Jakobsen naapertorlugu, Trumpip piumasaqaatini nunat ilaanni iluatsissinnaavaa allanilu iluatsinngitsoorlugu. Taamaammat USA-p nunat tamaasa immikkut isumaqatigiissuteqarfigisariaqarsinnaassavai.
AAMMA ATUARUK Kiffartuussinissamik isumaqatigiissutip nutaap aningaasartuutivut affaannanngortippai
- Amerikamiut periarfissaqarfigisaminni kimigiisissajunnarsipput, nunanilu allani imminnut pingaarutilimmik sakkutooqarfeqartuni akiliuteqartoqannginnissaa akueriinnartariaqassavaat, lektori aallakaatitassiamut P1 Morgenimut taama oqarpoq.
Siunnersuut Cost+50 pisortatigoortumik suli saqqummiunneqanngilaq, tusagassiorfiilli Bloombergip Washington Postillu allaaserisaat naapertorlugit siunnersuut Amerikamiut naalakkersuisunit 'piviusorsiortumik suliarineqarpoq'.
Amerikamiut nunani assigiinngitsuni 160-ini ullumikkut sakkutooqarfeqarput.
