Assi: KNR

Aallartitaq: Kiffartuussinissamik isumaqatigiissutip nutaap aningaasartuutivut affaannanngortippai

Vectrus A/S-ip Pituffimmi sakkutooqarfimmi siorna oktobarip qaammataani ulluinnarni ingerlatsisunngormat, USA-p kiffartuussinissamik isumaqatigiissummut aningaasartuutigisartagai affaannanngortinneqarput, amerikamiut Danmarkimi aallartitaat taama oqarpoq.

Amerikamiut aallartitaat Carla Sands, nunatta Amerikallu akornanni ilisimatusarnikkut suleqatigiinnerat pillugu ataatsimeersuarnermut atatillugu ulluni makkunani nunatsinniippoq. Tassungalu atatillugu, Pituffimmi sakkutooqarfimmi Thule Air Basemi kiffartuussinissamik isumaqatigiissut pillugu suliaq qanoq isumaqarfigineraa KNR-imit siullerpaamik apersorneqarpoq.

AAMMA ATUARUK Pituffimmi kiffartuussinissamik isumaqatigiissutip annaaneqarnera

Ingerlatseqatigiiffiullu amerikamiunit pigineqartup, ullumikkullu Vetrus Services A/S-imik taaguuteqartup, isumaqatigiissummik tunineqarnera inatsisinik unioqqutitsinertaqanngitsoq naqissuserpaa.

Kiffartuussinissamillu isumaqatigiissutip nutaap Amerikami akileraartartunut ukiut tamaasa aningaasarpassuarnik sipaaruteqarfiunissaa Carla Sandsip nuannaarutiginerarpaa.

- Sakkutooqarfiup ingerlanneqarnera Amerikami innuttaasunit aningaasalersorneqarpoq. Taamaammat aningaasat tamatumunnga atorneqartartut amerikamiut kaasarfiinersuupput. Tamanut ammasumik suliariumannittussarsiuussisoqarpoq, neqeroorullu akikinnerpaaq amerikamiut ingerlatseqatigiiffiannit Danmarkimi ingerlatseqatigiiffiup ataaniittumeersuuvoq. Tamatumalu inatsisit malillugit eqqortumillu pisimanera eqqartuussisunit arlarlinnit tusarniaanernilu arlalinni aalajangerneqarpoq, aammali kiffartuussinissamik isumaqatigiissutaasimasumut naleqqiullugu Amerikami innuttaasut aningaasartuutigisartagaat affaannanngortinneqarput, aallartitaq kulturimut illorsuarmi Katuami KNR-imit ataasinngormat ualikkut apersorneqarluni oqarpoq.

- Præsident Trumpip anguniagaa tassaavoq America First (Amerika salliutillugu, aaqq.) - imaanngitsoq Amerika Only (Amerika kisiat, aaqq.). Tamannalu pissutigalugu amerikami naalakkersuisut amerikamiut, taakkulu atugaat, salliutittussaavaat. Tamanna amerikamiunut suliffinnik pilersitsinissamik amerikamiullu akileraartartuisa aningaasaataannik sipaarniarnissamik isumaqarpoq, aningaasammi pineqartut tamatsinneersuupput (amerikamiut, aaqq.). Nutaamik isumaqatigiissuteqartoqarneratigut Amerikami innuttaasut dollarserpassuarnik sipaaruteqarpoq, aamma isumaqatigiissuteqarneq inatsisit naapertorlugit pivoq.

AAMMA ATUARUK Pituffimmut tunngatillugu aaqqissuussinerit USA-p akueriumanngisai

Kiffartuussinissaq pillugu nutaamik isumaqatigiissuteqartoqarneratigut isertitassarpassuarnik annaasaqarnerup  Kalaallit Nunaanni pakatsissutigineqarnera paasisinnaaviuk?

- Isumaqatigiissutit isumaqatigiissutaapput. Præsident Trumpip anguniagaa tassaavoq Amerikami suliffinnik pilersitsinissaq Amerikamiullu aningaasaataannik sipaarnissaq. Aamma naalakkersuisussi siulittaasuat Danmarkimilu ministeriuneq taama anguniagaqarput, innuttaasumik atugaat salliutippaat. Tamannarpiaavorlu præsidentitatta siunertarisaa.

Kalaallit Nunaannili pakatsissutigineqarnera paasisinnaaviuk?

- Inuit pakatsisimasut misiginneqatigisinnaavakka? Inuinnaagama aamma soorunami taama misigisinnaavunga.

Nutaamik isumaqatigiissusiortoqassanngila?

- Tamanna oqaaseqarfigisinnaanngilara. Tamanna allat oqaloqatigiissutigisassaraat. Uanga amerikamiut amerikamiullu Kunngeqarfimmi maani sinniisuuffigiinnarpakka, Carla Sands KNR-imut oqarpoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat